Зборы тэрытарыяльных войскаў пачынаюцца ў двух раёнах Віцебскай вобласці

12 траўня, Позірк. Навучальныя зборы з ваеннаабавязанымі, прыпісанымі да тэрытарыяльных войскаў Лепельскага і Чашніцкага раёнаў (Віцебская вобласць), пачынаюцца 12 траўня, паведамляе прэс-служба Міністэрства абароны.

Паводле інфармацыі ведамства, у рамках збораў плануецца “правесці комплекс мабілізацыйных мерапрыемстваў, скіраваных на фармаванне органаў упраўлення тэрытарыяльнай абароны і вайсковых часцей тэрытарыяльных войскаў”. Гаворка пра прыём ваеннаабавязаных і іх забеспячэнне “з задзейнічаннем мясцовай базы мабілізацыйнага разгортвання”, аднаўленне навыкаў каманднага складу тэрытарыяльных войскаў у кіраванні падначаленымі, падрыхтоўку ваеннаабавязаных “да выканання задач тэрытарыяльнай абароны”.

“Падрыхтоўка ваеннаабавязаных будзе скіраваная на навучанне ўзгодненым сумесным дзеянням з супрацоўнікамі тэрытарыяльных органаў унутраных спраў і добраахвотнікамі народнага апалчэння пры выкананні задач тэрытарыяльнай абароны”, — гаворыцца ў паведамленні.

5 траўня Мінабароны паведаміла пра пачатак збораў з ваеннаабавязанымі тэрытарыяльных войскаў Лідскага раёна (Гродзенская вобласць).

З сярэдзіны студзеня па сярэдзіну сакавіка 2026 года ў Беларусі на даручэнне Аляксандра Лукашэнкі праходзіла раптоўная праверка боегатоўнасці ўсіх відаў і родаў Узброеных сіл — у абыход Міністэрства абароны.

Напрыканцы студзеня Мінабароны ініцыявала ўласную — “планавую” — комплексную праверку боегатоўнасці вайсковых часцей і падраздзяленняў.

Тэрытарыяльныя войскі — род войскаў Узброеных сіл, які склікаецца ў перыяд вайны або напружанай ваенна-палітычнай абстаноўкі. Выконвае дапаможныя функцыі. Складаецца з асоб, якія прайшлі службу і знаходзяцца ў запасе.

Разам з тым міністр абароны Віктар Хрэнін на сустрэчы з кіраўніцтвам выканкамаў — Мінскага гарадскога і абласных, а таксама вайсковымі камісарамі са сталіцы і рэгіёнаў 26 траўня 2023 года ў Гомелі заявіў, што тэрытарыяльная абарона “з сістэмы, якая забяспечвае, трансфармуецца ў паўнавартасную баявую”.

Рэжым Аляксандра Лукашэнкі практычна няспынна праводзіць вучэнні, трэніроўкі, зборы на фоне абвастрэння стасункаў з Захадам (акрамя ЗША пасля прыходу да ўлады прэзідэнта Дональда Трампа) і поўнамаштабнай вайны Расіі супраць Украіны.