Першы блок БелАЭС падключаны да сеткі пасля 10 дзён “прафілактычных работ”

7 траўня, Позірк. Першы энергаблок Беларускай АЭС зноў падключаны да сеткі, паведаміла ранкам 7 траўня прэс-служба ядзернага энергетычнага аб’екта.

Адзначаецца, што гэта было зроблена 6 траўня “пасля завяршэння прафілактычных работ на абсталяванні”.

Адміністрацыя БелАЭС паведаміла пра адключэнне першага блока ад сеткі для прафілактыкі і пра стабільны радыяцыйны фон ранкам 27 красавіка. Такім чынам, аб’ект не выдаваў электрычнасць у энергасістэму 10 дзён.

Збудаванне Беларускай АЭС паблізу Астраўца (Гродзенская вобласць) завяршылася ўвосені 2023 года. Станцыя пабудаваная паводле расійскага праекта, генеральным падрадчыкам выступіў “Расатам”. Першы энергаблок АЭС сілкуе энергасістэму Беларусі з 3 лістапада 2020 года, другі — з 13 траўня 2023-га. У прамысловую эксплуатацыю яны ўведзеныя ў чэрвені 2021-га і лістападзе 2023-га адпаведна.

У лістападзе 2025 года стала вядома, што ўлады маюць намер пабудаваць трэці энергаблок БелАЭС (уключыць у энергасістэму плануецца ў 2035–2038 гадах).

Пры гэтым яны не адмаўляюцца ад ідэі збудаваць другую атамную станцыю — ва ўсходняй частцы краіны.