Украіна і Расія зноў абмяняліся палоннымі на тэрыторыі Беларусі

24 красавіка, Позірк. Украіна і Расія зноў абмяняліся ваеннапалоннымі 24 красавіка на тэрыторыі Беларусі, паведамляюць крыніцы з абедзвюх краін.

Прэзідэнт Украіны Уладзімір Зяленскі адзначыў, што “193 вайскоўцы Узброеных сіл, Нацыянальнай гвардыі, Дзяржаўнай памежнай службы, Нацыянальнай паліцыі і Дзяржаўнай спецыяльнай службы транспарту” вяртаюцца ў краіну. “Яны абаранялі Украіну на розных кірунках. Маюцца і тыя, супраць каго Расія ўзбудзіла крымінальныя справы, маюцца параненыя”, — напісаў ён у сваім тэлеграм-канале.

Паводле інфармацыі Міністэрства абароны РФ, 193 расійскія вайскоўцы “знаходзяцца на тэрыторыі Рэспублікі Беларусь, дзе ім аказваецца неабходная псіхалагічная і медыцынская дапамога”. Пасля яны “будуць дастаўленыя ў РФ для праходжання лячэння і рэабілітацыі ў медыцынскіх установах” Мінабароны.

Ваеннае ведамства паведаміла, што “пасрэдніцкія намаганні гуманітарнага характару пры вяртанні расійскіх вайскоўцаў з палону” аказалі ЗША і ААЭ.

Гэта пяты ад пачатку года абмен украінскімі і расійскімі палоннымі праз тэрыторыю Беларусі.

Першы ў 2026 годзе абмен ваеннапалоннымі паміж Украінай і РФ праз Беларусь адбыўся 5 лютага (157 чалавек з кожнага боку), другі — 5 сакавіка (па 200), трэці — 6 сакавіка (па 300), чацвёрты — 11 красавіка (па 175 вайскоўцаў і 7 цывільных).

12 красавіка ў праграме “Галоўны эфір” на тэлеканале “Беларусь 1” выйшаў рэпартаж, з якога вынікала, што расійскія вайскоўцы, якія вызваляюцца з украінскага палону, праходзяць лячэнне ў Гомелі.