Два банкі, якія працуюць у Беларусі, паведамілі аб спыненні працы іх карт Mastercard у 31 краіне

17 красавіка, Позірк. “Альфа Банк“ і “Белгазпрамбанк” паведамілі, што з 21 красавіка іх карты аплатнай сістэмы Mastercard перастануць прымаць у 31 краіне Еўропы.

У спісе: Аўстрыя, Балгарыя, Бельгія, Венгрыя, Вялікабрытанія, Германія, Грэцыя, Данія, Ірландыя, Ісландыя, Іспанія, Італія, Кіпр, Латвія, Літва, Ліхтэнштэйн, Люксембург, Мальта, Нарвегія, Нідэрланды, Партугалія, Польшча, Румынія, Славакія, Славенія, Фінляндыя, Францыя, Харватыя, Чэхія, Швецыя, Эстонія.

Гэта азначае, што ў названых дзяржавах па картах Mastercard не атрымаецца зняць наяўныя грошы ў банкаматах, расплаціцца ў крамах і анлайн, у тым ліку пры аплаце пакупак на маркетплейсах, замове таксі або дастаўкі, а таксама адправіць пераводы з карты на карту праз лакальныя сервісы.

У Беларусі і не пералічаных вышэй краінах карты Mastercard, выпушчаныя гэтымі банкамі, працягваюць працаваць.

Раней два названых банка, а таксама “Белаграпрамбанк“ абвясцілі, што выпушчаныя імі карткі Visa не працуюць на тэрыторыі многіх еўрапейскіх краін.