17 красавіка, Позірк. Сутыкненне аўтамабіля з ласём каля аграгарадка Пяршаі Валожынскага раёна Мінскай вобласці здарылася познім вечарам 16 красавіка, паведамляе Міністэрства па надзвычайных сітуацыях.
Работнікі МНС дэблакавалі кіроўцу і пасажыра, абодва шпіталізаваныя.
26 лютага на прэс-канферэнцыі начальнік упраўлення аналізу і кантролю за аховай і выкарыстаннем аб’ектаў жывёльнага і расліннага свету Дзяржаўнай інспекцыі аховы жывёльнага і расліннага свету Дзмітрый Матаро паведаміў, што ў дарожна-транспартных здарэннях у 2025 годзе загінула 5,1 тыс. дзікіх жывёл — на 32% больш у параўнанні з 2024-м.
Паводле яго слоў, тэндэнцыя істотнага росту колькасці ДТЗ з удзелам дзікіх жывёл захоўваецца і ў 2026 годзе. У студзені зарэгістравана 318 выпадкаў гібелі дзікіх жывёл, што больш чым на 30% перавышае паказчык студзеня 2025-га.
Найчасцей гінуць казулі і ласі.
Паводле звестак Дзяржаўтаінспекцыі, за 2025 год зафіксавана 71 ДТЗ з удзелам дзікіх жывёл, у якіх пацярпелі людзі. Загінула 16 чалавек, 80 атрымалі раненні рознай ступені цяжкасці. Для параўнання: у 2024-м было зафіксавана 58 такіх ДТЗ, загінула дзевяць чалавек, 68 паранена. У 2023-м годзе загінула шэсць чалавек, траўмавана 64.
Чыноўнікі раней заяўлялі, што праблема ДТЗ з удзелам жывёл можа быць вырашаная толькі комплексна, што ўключае рэгуляцыю колькасці жывёл, будаўніцтва агародж дарог і пераходаў.
Аўтарызавацца
Забыліся пароль?
Выхад з профілю
