Прадстаўніцтва ЕС “з палёгкай даведалася” пра вызваленне Статкевіча і “прыняло да ўвагі” выхад на волю Левай
20 лютага, Позірк. Прадстаўніцтва Еўрапейскага саюза ў Беларусі “з вялікай палёгкай даведалася пра вызваленне палітычнага вязня Мікалая Статкевіча”.
“Мы разумеем, што спадар Статкевіч, знаходзячыся пад вартай, нядаўна сутыкнуўся з пагрозлівым для жыцця станам здароўя, і зычым яму поўнага і больш хуткага акрыяння”, — адзначыла дыппрадстаўніцтва на сваёй старонцы ў “Фэйсбуку”.
“Мы таксама прымаем да ўвагі вызваленне палітычнай зняволенай Наталлі Левай, якая чакае нараджэння дзіцяці ў сакавіку. Мы заклікаем неадкладна і безумоўна вызваліць усіх палітвязняў”, — дадалі дыпламаты.
Пра тое, што Статкевіч знаходзіцца дома і аднаўляецца пасля інсульту напярэдадні ўвечары паведаміў праваабарончы цэнтр “Вясна” са спасылкай на жонку апазіцыйнага лідара Марыну Адамовіч.
20 лютага прэс-сакратар Аляксандра Лукашэнкі Наталля Эйсмант паведаміла, што палітык прыняў адпаведнае рашэнне на падставе просьбы сваякоў Статкевіча.
Напярэдадні таксама стала вядома, што Лукашэнка падпісаў указ пра памілаванне Наталлі Левай, “асуджанай за злачынствы экстрэмісцкай скіраванасці”.
“Гэтае рашэнне прынятае кіраўніком дзяржавы зыходзячы з прынцыпаў гуманнасці і з улікам жыццёвай сітуацыі асуджанай (жанчына цяжарная). Прымаўся да ўвагі яе асабісты зварот да прэзідэнта з хадайніцтвам аб памілаванні, дзейнае раскаянне і паводзіны падчас адбывання пакарання”, — гаварылася ў паведамленні.
Паводле даных праваабарончага цэнтра “Вясна”, у Беларусі цяпер 1.144 чалавекі са статусам палітвязня.
