У 2025 годзе на вытворчасці загінула 103 чалавекі — гэта гістарычны мінімум

13 лютага, Позірк. На вытворчасці ў 2025 годзе траўмавана 1.835 работнікаў, з іх са смяротным зыходам — 103, паведамляе Генеральная пракуратура Беларусі.

Пытанні забеспячэння бяспекі працы ў Беларусі “працягваюць заставацца актуальнымі”, адзначае наглядны орган.

Паводле звестак Міністэрства працы і сацыяльнай абароны Беларусі, у 2024 годзе на вытворчасці траўмаваліся 1.849 чалавек (-1 да 2023-га).

Колькасць загінулых на вытворчасці скарацілася са 117 да 105. Гэта быў гістарычны мінімум за ўсе гады існавання Беларусі, сцвярджала Мінпрацы. Такім чынам, паказчык 2025 года стаў новым гістарычным мінімумам.

Людзі працягваюць гінуць на вытворчасці і ў 2026 годзе.

10 лютага 33-гадовы электрагазазваршчык загінуў падчас рамонту зламанага драбільнага млына ў Касцюковічах (Магілёўская вобласць). Днём раней пры рамонце тэхнікі загінуў 41-гадовы рабочы аднаго з сельгаспрадпрыемстваў Салігорскага раёна (Мінская вобласць).