24 студзеня, Позірк. Канцылярыя прэзідэнта Польшчы запрасіла прадстаўнікоў дэмакратычных сіл Беларусі ўзяць удзел 24 студзеня ў цырымоніі ўшанавання памяці паўстанцаў 1863–1864 гадоў (у польскай гістарыяграфіі — Студзеньскае паўстанне), вынікае з паведамлення Аб’яднанага пераходнага кабінета (АПК).
Паводле інфармацыі палітычнай структуры, плануецца, што кіраўніца АПК Святлана Ціханоўская, яе намеснік і кіраўнік Народнага антыкрызіснага ўпраўлення Павел Латушка, спікер Каардынацыйнай рады Арцём Брухан, а таксама ветэран беларускага палка імя Кастуся Каліноўскага, што ваюе на баку Украіны (імя не называецца) далучацца да цырымоніі ўшанавання памяці паўстанцаў, а таксама цырымоніі ўскладання вянкоў, прысвечанай 163-й гадавіне пачатку паўстання, якая адбудзецца ля Брамы стратаў (Brama Straceń) у Варшаўскай цытадэлі.
“У цырымоніі ўскладання вянкоў плануецца ўдзел прэзідэнта Польшчы Караля Наўроцкага з жонкай Мартай Наўроцкай, прэзідэнта Літвы Гітанаса Наўседы з жонкай Дыянай Наўседзене, а таксама амбасадара Украіны ў Польшчы Васыля Боднара”, — гаворыцца ў паведамленні.
Згодна з раскладам на сайце прэзідэнта Польшчы, каля 12:30 па мясцовым часе (14:30 паводле Мінска) Наўроцкі і Наўседа разам з жонкамі, а таксама скаўтамі запаляць свечкі ля “сімвалічных магіл удзельнікаў Студзеньскага паўстання”, а пасля возьмуць удзел у цырымоніі да 163-й гадавіны пачатку паўстання.
