19 лістапада, Позірк. Праца пунктаў пропуску Шальчынінкай (з беларускага боку Беняконі) і Мядзінінкай (Каменны Лог) адновіцца ў 00:00 па літоўскім (01:00 па беларускім) часе 20 лістапада, вынікае з інфармацыі на сайце ўрада Літвы.
Пры гэтым паведамляецца, што рух праз згаданыя памежныя пункты будзе магчымы “толькі на аўтамабілі“. Такім чынам, пра аднаўленне аўтобуснага руху, верагодна, на дадзеным этапе гаворка не вядзецца.
Таксама “можа ўводзіцца часовае абмежаванне на перамяшчэнне асоб праз пункты Шальчынінкай і Мядзінінкай, калі будуць дастатковыя падставы меркаваць, што такое перамяшчэнне штучна арганізаванае, заахвочваецца або дазваляецца пры ўдзеле суседніх дзяржаў і стварае пагрозу нацыянальным інтарэсам бяспекі Літоўскай Рэспублікі”.
Пра тое, што ўрад Літвы прыняў рашэнне адкрыць мяжу з Беларуссю, стала вядома днём 19 лістапада.
18 лістапада прэм’ер-міністр краіны Інга Ругінене адзначыла, што апошнім часам маштаб выкарыстання паветраных шароў з кантрабанднымі цыгарэтамі знізіўся. Яна не звязвае гэта са змяненнем умоў надвор’я.
Палітык адзначыла, што адкрыццё мяжы дазволіць вярнуцца ў Літву з літоўскай рэгістрацыяй, падкрэсліўшы пры гэтым права Вільнюса “зусім не адкрываць памежныя пункты або ў любы момант зноў іх закрыць, калі яны будуць адкрытыя“.
У канцы кастрычніка Літва сутыкнулася з неаднаразовым масавым прылётам з Беларусі паветраных шароў і метэазондаў, якія выкарыстоўваюць кантрабандысты для перакідання цыгарэт. Рэагуючы на гэта, Вільнюс некалькі разоў часова закрываў пункты пропуску, а 29 кастрычніка літоўскі ўрад вырашыў закрыць іх на больш працяглы тэрмін — да 24:00 30 лістапада (1:00 1 снежня па мінскім часе) з магчымасцю падаўжэння.
У адказ урад Беларусі 31 кастрычніка прыняў пастанову № 599 “Аб прымяненні спецыяльнай абмежавальнай меры”, якой забараніў зарэгістраваным у Літве грузавым аўтамабілям, цягачам, прычэпам і паўпрычэпам праязджаць праз усе пункты пропуску, за выключэннем літоўскіх.
У выніку сітуацыі, якая склалася ў Беларусі затрымалася прынамсі 1,3 тыс. літоўскіх грузавікоў, якія ўлады ў Мінску распарадзіліся змясціць на стаянкі — пад платную ахову.
Вільнюс беспаспяхова паспрабаваў вярнуць транспарт шляхам кантактаў на ведамасным узроўні. Беларусь прапанавала Літве альбо адмяніць рашэнне аб закрыцці мяжы, альбо выйсці на палітыка-дыпламатычнае вырашэнне праблемы.
17 лістапада аднавілі працу пункты пропуску Кузніца Беластоцкая (Брузгі) і Баброўнікі (Бераставіца) на польска-беларускай мяжы.
Пункт пропуску Баброўнікі Польшча закрыла ў лютым 2023 года пасля прысуду актывісту неафіцыйнага Саюза палякаў Беларусі, палітвязню журналісту Анджэю Пачобуту (8 гадоў пазбаўлення волі), Кузніцу — у лістападзе 2021 года праз міграцыйны крызіс.
