Прадстаўнік Генштаба анансаваў чарговыя вучэнні АДКБ на тэрыторыі Беларусі

16 лістапада, Позірк. Спецыяльныя вучэнні сіл Арганізацыі Дагавора аб калектыўнай бяспецы (АДКБ) “Бар’ер-2026” анансаваў у інтэрв’ю “ВаенТВ” начальнік войскаў радыяцыйнай, хімічнай і біяабароны (РХБ) Генштаба Узброеных сіл Вячаслаў Старкоў.

Паводле яго слоў, вучэнні пройдуць у наступным годзе на тэрыторыі Беларусі, падчас манеўраў будзе працягнутая “практыка сумеснага выканання задач па ліквідацыі біялагічных пагроз у інтарэсах Калектыўных міратворчых сіл” АДКБ.

Раней паведамлялася аб удзеле вайсковага кантынгенту Беларусі ў вучэннях з міратворчымі сіламі АДКБ “Бар’ер-2025” на тэрыторыі Таджыкістана.

Заяўлялася, што падчас вучэнняў беларускія вайскоўцы “прымуць актыўны ўдзел у адпрацоўцы задач па падтрыманні міру і бяспекі ў Цэнтральнаазіяцкім рэгіёне”, асаблівая ўвага будзе нададзена “ўдасканаленню навыкаў прымянення сучасных сродкаў і тэхналогій ва ўмовах аператыўнай абстаноўкі, якая хутка змяняецца”.

Раней Мінабароны паведамляла, што на вучэннях “Бар’ер-2025” будуць упершыню праведзеныя манеўры з сумесным фарміраваннем радыяцыйнай, хімічнай і біялагічнай абароны і медыцынскага забеспячэння, мяркуецца адпрацоўка вайскоўцамі “задач па ліквідацыі біялагічных пагроз у інтарэсах Калектыўных міратворчых сіл”.

З 31 жніўня па 6 верасня ў Беларусі праходзілі вучэнні з Калектыўнымі сіламі аператыўнага рэагавання (КСАР) АДКБ “Узаемадзеянне-2025”, “Пошук-2025” і “Эшалон-2025”.

12–16 верасня прайшлі маштабныя беларуска-расійскія вучэнні “Захад-2025”, падчас якіх былі адпрацаваныя “планаванне ўжывання” ядзернай зброі і комплексу “Арэшнік”, а таксама супрацьпаветраная абарона, абарончыя баявыя дзеянні, падтрымка тактычнай авіяцыі і інш.

У АДКБ уваходзяць Арменія, Беларусь, Казахстан, Кыргызстан, Расія і Таджыкістан, аднак улады Арменіі замарозілі ўдзел краіны ў арганізацыі і заяўляюць аб магчымым выхадзе з блока. Ерэван абвінавачвае арганізацыю ў бяздзейнасці падчас карабахскага канфлікту з Азербайджанам, а асобных членаў — у тым, што яны “планавалі вайну” супраць Арменіі разам з Баку.