Грамадзяне Беларусі змогуць да 30 дзён знаходзіцца ў Кыргызстане без рэгістрацыі

29 верасня, Позірк. Міжурадавае беларуска-кыргызстанскае пагадненне аб парадку знаходжання грамадзян на тэрыторыі дзвюх краін падпісана 29 верасня ў Мінску падчас візіту старшыні Кабінета міністраў — кіраўніка Адміністрацыі прэзідэнта Кыргызстана Адылбека Касымаліева.

Як паведамляе прэс-служба беларускага ўрада, пасля ўступлення дакумента ў сілу “грамадзяне адной краіны, якія часова знаходзяцца на тэрыторыі другой, будуць вызваляцца ад абавязку рэгістрацыі ў кампетэнтных органах на працягу 30 каляндарных дзён з даты ўезду”.

Адзначаецца, што падчас візіту падпісаныя таксама пагадненне аб рэадмісіі, “дарожная карта” аб развіцці гандлёва-эканамічнага супрацоўніцтва да 2030 года і міжведамасны мемарандум аб супрацоўніцтве ў сферы лічбавага развіцця.

Касымаліеў прыбыў у Мінск для ўдзелу ў пасяджэнні Савета кіраўнікоў урадаў СНД.