Судаленка: Трамп пасылае надзею на хуткае вызваленне Бяляцкага

25 верасня, Позірк. Праваабаронцы віншуюць з днём нараджэння кіраўніка цэнтра “Вясна”, палітвязня, лаўрэата Нобелеўскай прэміі міру 2022 года Алеся Бяляцкага. 25 верасня яму споўнілася 63 гады

“Вясна” адзначае, што Бяляцкі сустракае за кратамі пяты дзень нараджэння запар, а ўлічваючы папярэдняе зняволенне — восьмы.

“Сёння ўжо пяты твой дзень нараджэння, які ты сустракаеш у засценках беларускага ГУЛАГа, — нагадаў пра гэта на сваёй фэйсбук-старонцы праваабаронца Леанід Судаленка. — Пяць гадоў таму, калі арыштавалі мяне, ты дасылаў у камеру цёплыя словы падтрымкі і ўсяляў надзею: “Трымайся, Лявон, да восені мы цябе выцягнем!” А потым за краты кінулі і цябе. І цяпер мая чарга выцягваць”.

“Алесь, цяжка падабраць словы, каб перадаць усё тое, што сёння ляжыць у мяне на душы. Але ведай — мы пра цябе не забыліся! Твой голас гучыць у Еўрапарламенце і ААН, у шведскім Рыксдагу, літоўскім Сейме і нямецкім Бундэстагу. За тваё вызваленне моляцца ў Ватыкане, твой голас дакаціўся да самых высокіх трыбун свету. Нават прэзідэнт ЗША Трамп пасылае надзею на тваё хуткае вызваленне. Увесь свет ведае, што беларускі рэжым трымае нобелеўскага лаўрэата ў турэмнай робе. І хоць зло пакуль перамагае, мы верым і чакаем хуткай сустрэчы на волі! Беражы сябе і сваё здароўе, Алесь! Нам цябе не хапае!”

Таксама павіншаваў Бяляцкага Алег Арлоў — расійскі праваабаронца, адзін з кіраўнікоў праваабарончага цэнтра “Мемарыял”, удастоенага Нобелеўскай прэміі ў адзін год з Бяляцкім. Арлоў адзначыў, што 63 гады — гэта зусім няшмат: “І на волі табе трэба будзе яшчэ зрабіць масу спраў, шмат убачыць, шмат адчуць. Галоўнае — дачакацца. Дачакацца гэтай хуткай, я ўпэўнены, вельмі хуткай свабоды”.

Кіраўнік “Вясны” Бяляцкі, яго намеснік і віцэ-прэзідэнт Міжнароднай федэрацыі за правы чалавека (FIDH) Валянцін Стэфановіч і каардынатар кампаніі “Праваабаронцы за свабодныя выбары” Уладзімір Лабковіч былі затрыманыя 14 ліпеня 2021 года. 3 сакавіка 2023 года ў рамках палітычна матываванай справы аб “кантрабандзе грошай” і “фінансаванні парушэння грамадскага парадку” яны былі прыгавораныя да 10, 9 і 7 гадоў зняволення адпаведна.

У жніўні 2023 года Міністэрства ўнутраных спраў прызнала “Вясну” “экстрэмісцкім фарміраваннем”.