Латвія не можа атрымліваць ад Беларусі інфармацыю пра набліжэнне дронаў — прадстаўнік Мінабароны Равенка

18 верасня, Позірк. Вайскова-палітычнае кіраўніцтва Польшчы і Літвы пацвердзіла “наяўнасць каналаў сувязі і кантактаў” з Вайскова-паветранымі сіламі і войскамі супрацьпаветранай абароны Беларусі, заявіў 18 верасня начальнік дэпартамента міжнароднай вайсковай супрацы (МВС) — памочнік міністра абароны па пытаннях МВС Валерый Равенка.

“Пры гэтым Латвія ў 2024 годзе разарвала адпаведнае пагадненне, што не дазваляе ёй своечасова атрымліваць ад Беларусі інфармацыю пра набліжэнне неапазнаных беспілотных лятучых апаратаў”, — напісаў прадстаўнік Мінабароны на сваёй старонцы ў сацыяльнай сетцы Х.

Ранкам 10 верасня польскія ўлады паведамілі пра масавае ўварванне расійскіх дронаў на тэрыторыю краіны — першае за тры з паловай гады поўнамаштабнай агрэсіі РФ супраць Украіны. Паводле інфармацыі ўкраінскіх маніторынгавых каналаў, частка расійскіх дронаў прыляцела ў Польшчу праз Брэсцкую вобласць. Варшава заявіла пра “акт агрэсіі”. Для нейтралізацыі БПЛА задзейнічалі сілы як Польшчы, так і іншых краін НАТО.

Начальнік Генеральнага штаба — першы намеснік міністра абароны Беларусі Павел Муравейка заявіў, што “праз наяўныя каналы ўзаемадзеяння ў перыяд з 23:00 гадзін 9 верасня да 4:00 10 верасня дзяжурныя сілы і сродкі [Беларусі] абменьваліся інфармацыяй пра паветраную і радыёлакацыйную абстаноўку з дзяжурнымі сіламі і сродкамі Польшчы і Літоўскай Рэспублікі”. “Тым самым апавясціўшы іх пра набліжэнне невядомых лятучых апаратаў да тэрыторыі іх краін”, — дадаў прадстаўнік ваеннага ведамства.

Паводле яго сцвярджэння, гэта дазволіла польскаму боку аператыўна адрэагаваць на дзеянні беспілотнікаў, падняўшы ў паветра свае дзяжурныя сілы.