Польскія памежнікі паведамілі пра 16 выпадкаў канфіскацыі беларускіх нелегальных цыгарэт на 90 тыс. долараў

9 верасня, Позірк. Пра 16 выпадкаў кантрабанды цыгарэт з Беларусі паведаміла 9 верасня Памежная ахова Польшчы.

Адзначаецца, што цыгарэты дастаўляліся ў Падляскае ваяводства з дапамогай метэазондаў, затрымана 7 чалавек — атрымальнікаў грузаў.

Кошт канфіскаваных цыгарэт ацэньваецца ў 330.000 злотых (больш за 91 тыс. долараў).

Удакладняецца, што двое грамадзян Польшчы, якія перавозілі цыгарэты, былі спыненыя памежнікамі ў Кузніцы ўначы на 9 верасня. Іншыя партыі кантрабанды супрацоўнікі памежнай службы выявілі ў сямі тайніках.

Супрацоўнікі памежнага паста ў Новым Двары “выявілі ў полі пакет з рэшткамі метэаралагічнага шара”, у ім знаходзілася 1.500 пачкаў цыгарэт.

Такая ж колькасць выяўлена ў зоне адказнасці памежнага паста ў Крынках.

Супрацоўнікі памежнай службы з Аўгустова затрымалі з доказамі злачынства двух грамадзян Польшчы і грамадзяніна Літвы, якія прыбылі ў дамоўленае месца па кантрабандныя цыгарэты.

Прадстаўнікі гэтага ж тэрытарыяльнага памежнага органа разам з супрацоўнікамі Нацыянальнай падатковай адміністрацыі выявілі пакет з 1.500 пачкаў цыгарэт без польскіх акцызных марак.

Яшчэ некалькі чалавек, звязаных з кантрабандай тытунёвых вырабаў з дапамогай метэаралагічнага шара, затрыманыя супрацоўнікамі памежнага паста ў Мельніку. Паведамляецца, што “ў месцы, дзе ляжаў пакунак, абгорнуты чорнай плёнкай, <…> для яго атрымання з’явіліся двое грамадзян Польшчы”.

Усім затрыманым будуць прад’яўленыя крымінальныя абвінавачванні, гаворыцца ў паведамленні з загалоўкам “Усходнія вятры не дапамаглі”.