Віцебскі “Маналіт” адправіў тавараў на 40 млн долараў ваеннаму прадпрыемству РФ — БРЦ

13 жніўня, Позірк. З пачатку поўнамаштабнага ўварвання Расіі ва Украіну па сакавік 2025 года Віцебскі завод радыёдэталяў “Маналіт” адправіў тавараў на суму больш за 40 млн долараў на адрас расійскай кампаніі “Спец-электронкамплект”, паведамляе Беларускі расследавальніцкі цэнтр (БРЦ).

Гэта пацвярджаюць дакумэнты, якія БРЦ атрымаў ад крыніцы ў лагістычнай галіне ў рамках сумеснага расследавання з “Радыё Свабода” і ўкраінскім расследавальніцкім праектам “Слідство.Инфо“.

АТ “Спец-электронкамплект” з’яўляецца пастаўшчыком кампанентаў мікраэлектронікі для буйных прадпрыемстваў расійскага ваенна-прамысловага комплексу (ВПК). Сярод яго кліентаў, у прыватнасці, НДІ “Вектар”, які распрацоўвае сістэмы процідзеяння беспілотнікам і комплексы радыёразведкі, адзначаецца ў расследаванні.

Паводле звестак аўтараў, больш за 96% закупак “Спец-ЭК” у “Маналіта” склалі керамічныя кандэнсатары (ключавы элемент мікрасхем).

Таксама адзначаецца, што былы дырэктар “Маналіта” Акіф Гасымаў паведамляў у 2018 годзе, што асноўны спажывец прадукцыі прадпрыемства — ваенна-прамысловы комплекс, найперш расійскі.

Спецыяліст у сферы электронікі, які служыць ва Узброеных сілах Украіны і пажадаў застацца ананімным, у інтэрв’ю “Радыё Свабода” заявіў, што кандэнсатары “ВЗРД “Маналіт” знаходзяць у аскепках ракет “Іскандэр”, Х-101 і “Калібр”, выпушчаных УС РФ па ўкраінскай тэрыторыі.

Завод уключаны ў санкцыйныя спісы Украіны з траўня 2023 года, пры гэтым санкцыі ЕС на яго не распаўсюджваюцца, зазначаюць расследавальнікі. Паводле іх звестак, выпуск і адгрузка кандэнсатараў выраслі на 39% у 2023-м у параўнанні з 2022-м і на 85% за першыя два гады вайны.

На сайце беларускай кампаніі паведамляецца, што ў 2012 годзе кантрольны пакет акцый “Маналіта” быў набыты ТАА “Кулон” — пецярбургскім прадпрыемствам, якое спецыялізуецца на выпуску керамічных кандэнсатараў, фільтраў і падобнай прадукцыі.

У адкрытых крыніцах ёсць даныя аб тым, што “Кулон” вырабляе “ўнікальныя радыёэлементы” для ваеннай тэхнікі, беспілотнікаў у прыватнасці. За 2022 год павялічыў магутнасці ў тры разы, у 2023-м планаваў павялічыць вытворчасць яшчэ ў паўтара раза.

Паводле даных на сайце “Маналіта”, прадпрыемства распрацоўвае і выпускае шматслойныя керамічныя кандэнсатары катэгорый якасці “УП”, “АС”, “ОСМ”, “АТК”.

У апошнія гады прадпрыемства закупіла “новае сучаснае тэхналагічнае абсталяванне, правяло комплексную мадэрнізацыю вытворчасці, асвоіла выпуск новых кандэнсатараў К10-84, МОВ, МЧВ катэгорый якасці “УП” і “АТК”, удасканальвае тэхналогію вырабу кандэнсатараў”.

Таксама “Маналіт” выпускае тэрмарэзістары, мініяцюрныя керамічныя трубкі, паветранагравальныя рэгістры, керамічныя матэрыялы.

Канчатковымі спажыўцамі вырабаў ААТ “ВЗРД “Маналіт” з’яўляюцца больш за 600 прадпрыемстваў і арганізацый.