Кіраўнік МЗС Літвы звярнуў увагу калегі з Ватыкана на абмежаванні свабоды веравызнання ў Беларусі

26 чэрвеня, Позірк. Міністр замежных спраў Літвы Кястуціс Будрыс на сустрэчы 26 чэрвеня ў Вільнюсе з сакратаром па адносінах Святога Пасаду з дзяржавамі арцыбіскупам Полам Рычардам Галахерам “звярнуў увагу” на “дзеючую канфрантацыйную палітыку Беларусі, пагаршэнне сітуацыі з правамі чалавека ў гэтай краіне і абмежаванні свабоды веравызнання”, вынікае з прэс-рэлізу літоўскага замежнапалітычнага ведамства.

Паведамляецца, што Галахер прыбыў у Літву ў якасці надзвычайнага пасланніка папы рымскага Льва XIV для ўдзелу ва ўрачыстых мерапрыемствах, прысвечаных 100-годдзю кананічнага заснавання Літоўскай царкоўнай правінцыі. Мерапрыемствы пройдуць 27 чэрвеня ў Каўнаскім кафедральным саборы.

У верасні 2020 года Галахер прыязджаў у Беларусь вырашаць сітуацыю арцыбіскупам з Тадэвушам Кандрусевічам (на той момант старшыня Канферэнцыі каталіцкіх біскупаў Беларусі і мітрапаліт Мінска-Магілёўскі), якому рэжым Аляксандра Лукашэнкі — на фоне заяў іерарха аб грамадска-палітычным крызісе ў краіне — не даваў вярнуцца на радзіму.

25 лютага летась у Жэневе (Швейцарыя) адбыліся перамовы Галахера і міністра замежных спраў Беларусі Максіма Рыжанкова.

Сёлета 27 траўня стала вядома пра сустрэчу папы рымскага ў Ватыкане з беларускім праваабаронцам, кіраўніком праваабарончага цэнтра “Вясна”, лаўрэатам Нобелеўскай прэміі міру Алесем Бяляцкім.

Экс-палітвязень перадаў пантыфіку асабістае пасланне, у якім апроч іншага гаворыцца пра пераслед у Беларусі вернікаў і святароў розных канфесій.

На наступны дзень, 28 траўня, мітрапаліт Мінска-Магілёўскі Іосіф Станеўскі ў інтэрв’ю Vatican News паскардзіўся на недахоп каталіцкіх святароў у Беларусі, выкліканы ў тым ліку тым, што беларускія ўлады адмаўляюцца працягваць дазволы на працу святарам з Польшчы.

Многія вернікі і рэлігійныя дзеячы адкрыта выказваліся аб грамадска-палітычным крызісе, які ўзнік на фоне сфальсіфікаваных прэзідэнцкіх выбараў 2020 года і жорсткасці сілавікоў у дачыненні да ўдзельнікаў пратэстных акцый, з прычыны чаго рэжым Лукашэнкі ўзмацніў кантроль рэлігійнай сферы.

У 2023 годзе на заканадаўчым узроўні рэлігійным арганізацыям фактычна забаранілі праяўляць палітычную актыўнасць не ў фарватары ўладаў і абавязалі перарэгістравацца.

З пачатку восені 2020 года па канец траўня 2026-га, паводле даных ініцыятывы “Хрысціянская візія”, з рэпрэсіямі ў Беларусі ў той ці іншай форме сутыкнуліся не менш за 93 хрысціянскія служыцелі, сярод іх 36 каталіцкіх.