Кіраўнік МНС накіраваў на ліквідацыю наступстваў непагадзі ў Мінскім раёне спецатрад “Зубр”

30 ліпеня, Позірк. Рэспубліканскі атрад спецыяльнага прызначэння “Зубр” накіраваны ў Мінскі раён “для аператыўнага аднаўлення ўмоў жыццядзейнасці насельніцтва”, паведамляе прэс-служба Міністэрства па надзвычайных сітуацыях.

Адпаведнае даручэнне даў кіраўнік МНС Вадзім Сіняўскі.

“Зубр” займаецца найбольш складанымі і небяспечнымі задачамі. Апрача аперацый у Беларусі спецатрад выконвае выратавальныя місіі за мяжой. Напрыклад, у сакавіку супрацоўнікі гэтага падраздзялення ўдзельнічалі ў ліквідацыі наступстваў землятрусу ў М’янме, у красавіку фармавалі груманітарны груз для пацярпелай ад ураганаў і землятрусаў Кубы.

Паводле інфармацыі міністэрства, “выратавальнікі працягваюць ліквідаваць наступствы праходжання навальнічнага фронту, на месцы працуе штаб ліквідацыі НС”.

“Каардынацыя ўсіх аварыйных службаў праводзіцца Мінскай раённай камісіяй па надзвычайных сітуацыях, — гаворыцца ў паведамленні. — Падраздзяленні МНС працягваюць распілоўваць дрэвы, што ўпалі, забяспечваючы магчымасць аварыйным брыгадам аднаўляць электразабеспячэнне”.

Цяпер ліквідацыяй наступстваў непагадзі займаецца “больш за 70 работнікаў Мінскага раённага аддзела па НС, РАСН “Зубр”, пажарнага аварыйна-выратавальнага атрада Мінскага абласнога ўпраўлення МНС”, задзейнічана “10 адзінак тэхнікі выратавальнага ведамства”.

“Агулам з першых хвілін рэагавання на наступствы праходжання навальнічнага фронту ў Мінскім раёне задзейнічана больш як 320 работнікаў надзвычайных і аварыйных службаў і больш як 40 адзінак тэхнікі”, — адзначыла МНС.

Раней ведамства паведаміла, што ў выніку праходжання ў Мінскай вобласці навальнічнага фронту зафіксаваныя 1.773 выпадкі падзення дрэў, імі пашкоджана 10 аўтамабіляў.

У аграгарадку Калодзішчы (Мінскі раён) ветрам пашкоджаныя дахі 17 жылых дамоў, перакрываўся рух у абодвух напрамках па вул. Караткевіча і Шпітальнай на ўчастках дарог агульнай працягласцю 700 м і ў садовым таварыстве “Трактар” ля аграгарадка, у выніку пашкоджання лініі электраперадачы без электразабеспячэння заставалася 600 прыватных жылых дамоў.