Мінфін другі раз за месяц знізіў цэны на каштоўныя металы, якія скупляюцца ў фізічных асоб, — за выключэннем залатых зубных пратэзаў

24 чэрвеня, Позірк. На каштоўныя металы, якія скупляюцца ў фізічных асоб у вырабах і ломе, устаноўлены новыя цэны, якія будуць дзейнічаць да 31 ліпеня, вынікае з пастановы Міністэрства фінансаў № 27 ад 18 чэрвеня, апублікаванай 24 чэрвеня на Нацыянальным прававым інтэрнэт-партале.

Страціўшым сілу ў дакуменце абвешчана аналагічная пастанова Мінфіна № 25 ад 10 чэрвеня. Устаноўленыя ім цэны таксама павінны былі дзейнічаць да 31 ліпеня, аднак былі змененыя праз 8 дзён (да гэтага кошты мяняліся 15 красавіка).

Як паказаў праведзены “Позіркам” аналіз, цяпер цэны зноў пераважна зніжаныя.

Выключэнне склаў толькі кошт 1 г зубных пратэзаў і іх элементаў з утрыманнем золата 900/750 пробы, які вырас з 234,90 да 316,55 рубля (+81,65 рубля; +34,76%). Пры гэтым кошт элементаў здымных зубных пратэзаў са сплаву золата 750-й пробы з плацінай і срэбрам знізіўся — на 7,95 рубля, або на 2,74% (з 290,02 да 282,07), дэталяў зубных пратэзаў срэбна-паладыевага сплаву — на 3,15 рубля, або на 11% (з 25,49 да 24,33).

Цэны на золата ў вырабах і ломе зніжаныя на 2,57%: за 1 грам 375-й пробы — да 134,13 рубля (раней 137,67; -3,54), 500-й — да 178,84 (183,56; -4,72), 583-й і 585-й — да 209,24 (214,77; -5,53), 750-й — да 268,26 (275,34; -7,08), 900-й — да 321,91 (330,41; -8,50), 916-й — да 327,63 (336,28; -8,65), 950-й — да 339,80 (348,76; -8,96), 958-й — да 342,66 (351,70; -9,04).

Паменшыўся кошт вырабаў і лому з срэбра, якія скупаюцца ў грамадзян: 750-й пробы — да 4,31 (4,61; -6,51%, -0,30), 800-й — да 4,60 (4,92; -6,5%, -0,32), 875-й — да 5,03 (5,38; -6,51%,-0,35), 916-й — да 5,27 (5,63; -6,39%, -0,36), 925-й — да 5,32 (5,69; -6,5%, -0,37), 960-й — да 5,52 (5,90; -6,44%, -0,38).

Плаціна 950-й пробы стала таннейшай на 5,92%, яе кошт знізіўся да 140,90 рубля (149,77; -8,87).

Сталі таннейшымі каштоўныя металы, не ўключаныя ў табліцу 1 дадатку да пастановы (вышэйзгаданыя вырабы і лом без проб): золата патаннела з 367,12 да 357,68 рубля за грам (-9,44; -2,57%), срэбра — з 6,15 да 5,75 (-0,40; -6,5%), плаціна — са 157,65 да 148,32(-9,33; -5,92%), паладый — са 111,85 да 107,23 (-4,62; -4,31%).

Кошт за 1 г сертыфікаванага залатога злітка знізіўся з 387,31 да 373,78 рубля (-13,53; -3,49%), срэбнага — з 6,40 да 5,92 (-0,48; -7,5%).