14-гадовы падлетак затрыманы ў Брэсце за распаўсюд наркотыкаў

24 чэрвеня, Позірк. Пра затрыманне “непаўналетняга закладчыка” паведамляе УУС Брэсцкай вобласці.

Затрыманы — 14-гадовы жыхар Брэста — з’яўляецца навучэнцам адной з устаноў адукацыі горада.

“Устаноўлена: хлопец у сетцы інтэрнэт знайшоў рэкламу інтэрнэт-наркамаркету. Паводле ўказання куратара ён забіраў дробныя партыі тавару, а затым распаўсюджваў праз закладкі на тэрыторыі Брэста. Злачынная кар’ера фігуранта доўжылася каля двух тыдняў, ён быў затрыманы з доказамі злачынства. Пры ім выяўлена і канфіскавана больш за 50 г асабліва небяспечнага псіхатропнага рэчыва мефедрон”, — гаворыцца ў паведамленні.

Распачатая крымінальная справа “за нарказбыт” (арт. 328 КК), адзначае УУС, падлетку пагражае да 15 гадоў пазбаўлення волі.

Адзначаецца, што крымінальная адказнасць за распаўсюд наркотыкаў надыходзіць у Беларусі з 14 гадоў.

Як паведамляў “Позірк“, паводле даных Вярхоўнага суда, у 2025 годзе колькасць асуджаных па “наркатычных“ артыкулах Крымінальнага кодэкса павялічылася на 7,9% у параўнанні з 2024-м.

За ўчыненне злачынстваў, звязаных з незаконным абаротам наркотыкаў, летась было асуджана 2.253 чалавекі — 8% усіх асуджаных (у 2024-м — 2.088; 6,6%).

З іх 2.077, або 92,2%, прызнана вінаватымі па арт. 328 (незаконны абарот наркатычных сродкаў, псіхатропных рэчываў, іх прэкурсораў і аналагаў), у 2024 годзе — 1.956, або 93,7%.