Лукашэнка: Трампу не варта дыктаваць Украіне, хто павінен быць прэзідэнтам
Уладзімір Зяленскі (злева) і Дональд Трамп 28 лютага 2025 года ў Белым доме. Перамовы скончыліся публічнай палемікай і датэрміновым ад'ездам прэзідэнта Украіны
16 кастрычніка, Позірк. Дональд Трамп не павінен вырашаць, хто будзе прэзідэнтам Украіны, але “пагадзіўся з неабходнасцю выканання Уладзімірам Зяленскім ранейшага абяцання абмежавацца адным тэрмінам”. Пра гэта заявіў Аляксандр Лукашэнка 16 кастрычніка падчас наведвання Верхнедзвінскага раёна Віцебскай вобласці, які мяжуе з Латвія і Расіяй.
“Хто будзе ва Украіне прэзідэнтам, вырашыць украінскі народ”, — заявіў ён дзяржСМІ, каментуючы нядаўнія выказванні прэзідэнта ЗША пра неабходнасць змены кіраўніка ўкраінскай дзяржавы.
“На выбары трэба ісці. У гэтым Трамп мае рацыю: абяцаў — трэба выконваць абяцанні. Але толькі дыктаваць не трэба. Трампу не варта дыктаваць, як паступіць Украіне”, — сказаў Лукашэнка.
Раней Зяленскі, які займае пасаду кіраўніка дзяржавы з 2019 года, заявіў, што гатовы правесці выбары, але для гэтага патрэбна спыненне агню на 60 дзён. Расія пагадзілася на рэжым цішыні толькі ў дзень выбараў. Украінскае заканадаўства забараняе праводзіць выбары падчас ваеннага стану. РФ пачала поўнамаштабную агрэсію 24 лютага 2022 года, у тым ліку з беларускай тэрыторыі.
Лукашэнка прызнаўся, што “раней падтрымліваў прыход Трампа да ўлады” і лічыць, што той яшчэ можа шмат што зрабіць на пасадзе прэзідэнта ЗША.
Выступоўца звязаў ціск Вашынгтона на Кіеў з залежнасцю Украіны ад амерыканскай дапамогі, у тым ліку разведвальных звестак і паставак зброі: “Ён чаму дыктуе? Таму што Зяленскі трапіў у залежнасць ад ЗША і ад таго ж Трампа”.
Адначасова Лукашэнка заклікаў іншыя краіны не трапляць у залежнасць ад буйных дзяржаў. У якасці прыкладу ён прывёў стасункі Беларусі з Расіяй, падкрэсліўшы, што Мінск імкнецца заставацца “каштоўным партнёрам Масквы”.
“Сябруй з імі, рабі ўсё неабходнае, каб яны падтрымлівалі з табой сяброўства. Мы з Расіяй сябруем, робім усё, каб Расія бачыла ў нас каштоўнасць”, — сказаў Лукашэнка.
Акрамя таго, ён раскрытыкаваў дзеянні ЗША ў Іране, заявіўшы, што амерыканская ваенная моц не робіць краіну непераможнай. “ЗША памыляюцца, калі лічаць, што ў свеце няма сіл, здольных іх спыніць”, — сказаў палітык.
2 кастрычніка Лукашэнка падзякаваў Трампу за тое, што той “адкрыта агаліў палітыку Захаду і найперш ЗША, нягледзячы на непаслядоўнасць яго выказванняў”.
У верасні 2026 года Лукашэнка распавеў пра намер прапанаваць ЗША ўдзельнічаць у будаўніцтве ў Беларусі азотнага камбіната.
