Запаволенне росту прамысловай вытворчасці фіксуецца 11 месяцаў запар

16 ліпеня, Позірк. Прамысловая вытворчасць у студзені — чэрвені 2025 года ў бягучых цэнах склала 102,4 млрд рублёў — на 0,3% больш, чым годам раней, сведчаць даныя Нацыянальнага статыстычнага камітэта.

Да сярэдзіны мінулага лета рост прамысловай вытворчасці пераважна паскараўся (у студзені 2024 года вытворчасць вырасла на 5,4%, студзені — лютым — на 7,1%, студзені — сакавіку — на 6,5%, студзені — красавіку — на 7,7%, студзені — траўні — на 8%, студзені — чэрвені — на 7,1%, студзені — ліпені — на 7,5%), але пасля стаў перманентна запавольвацца (у студзені — жніўні — 7,1%, студзені — верасні — 6,4%, студзені — кастрычніку — 6,2%, студзені — лістападзе — 5,5%, па выніках года — 5,4%).

У студзені 2025-га рост прамысловай вытворчасці ў гадавым вымярэнні склаў 2,9%, далей ён працягнуў запавольвацца (у студзені — лютым — 2%, студзені — сакавіку — 2,1%, студзені — красавіку — 1,4%, студзені — траўні — 1%).

Такім чынам, запаволенне росту прамысловай вытворчасці назіраецца на працягу апошніх 11 месяцаў.