У бальніцу Гродна дастаўлена сем пацярпелых у ДТЗ з удзелам маршруткі

20 траўня, Позірк. Сем чалавек пацярпелі 20 траўня ў дарожна-транспартным здарэнні ў Гродне, паведамляе тэлерадыёкампанія абласнога цэнтра.

ДТЗ здарылася на скрыжаванні вуліц Савецкіх Пагранічнікаў і Гагарына.

Паводле папярэдняй інфармацыі Дзяржаўтаінспекцыі, кіроўца аўтамабіля “Фольксваген Джэта” пры здзяйсненні развароту не даў перавагу маршрутнаму таксі “Мэрсэдэс”, у выніку чаго мікрааўтобус сутыкнуўся з аўтамабілем “Кіа”.

Адзначаецца, што на месца аварыі “неадкладна прыбылі экстраныя службы”.

Сем чалавек дастаўленыя ў бальніцу. Іх стан не ўдакладняецца.

12 лютага паведамлялася аб пяці пацярпелых у ДТЗ з удзелам маршруткі ў Мінску. Усіх траўмаваных брыгады хуткай дапамогі даставілі ў бальніцы, дзе “пасля правядзення дыягностыкі” яны былі шпіталізаваны.

Адзначалася, што ў пацярпелых спалучаныя траўмы рознай ступені цяжкасці. Былі праведзеныя аператыўныя ўмяшанні.

Паводле інфармацыі мінскай Дзяржаўтаінспекцыі, 12 лютага прыкладна ў 14:40 21-гадовы кіроўца аўтамабіля “ГАЗ” на прыпынку грамадскага транспарту паблізу дома № 174 па вул. Даўгінаўскі тракт “здзейсніў наезд на маршрутны транспартны сродак, які стаяў”.

19 студзеня пра ДТЗ з маршруткай паведамляла Міністэрства ўнутраных спраў. Сем чалавек, у тым ліку 11-гадовае дзіця, былі дастаўленыя ў бальніцу. Аварыя адбылася каля 10 гадзін на аўтадарозе, якая злучае Мінск і Мачулішчы.

29 снежня 2024 года ў выніку сутыкнення легкавога аўтамабіля БМВ і маршрутнага таксі ў Жыткавіцкім раёне (Гомельская вобласць) 11 чалавек, якія ехалі ў мікрааўтобусе, даставілі ў бальніцу для абследавання. Сярод іх было 8-гадовае дзіця.

16 снежня ў Валожынскім раёне (Мінская вобласць) здарылася аварыя з удзелам маршруткі, у якой было дзевяць пасажыраў. Паводле інфармацыі МУС, 66-гадовы кіроўца, які прыцягваўся да адказнасці больш як 40 разоў, не справіўся з кіраваннем і з’ехаў у кювет. Аўтамабіль перакуліўся.