Лукашэнка заявіў пра цікавасць да партоў Амана

19 траўня, Позірк. Аман цікавы Беларусі “па многіх напрамках”, але перш за ўсё — сваёй “партовай інфраструктурай”, якая дазваляе “працаваць у рэгіёне” і развіваць гандаль з іншымі краінамі, заявіў Аляксандр Лукашэнка 19 траўня на сустрэчы ў Мінску з наследным прынцам, міністрам культуры, моладзі і спорту гэтай блізкаўсходняй краіны Зеязінам бен Хайтамам аль Саідам.

Паводле слоў Лукашэнкі, якія перадае яго прэс-служба, цяпер Беларусь і Аман працуюць над пытаннямі гандлёва-эканамічнага супрацоўніцтва. Таксама Мінск цікавіць сфера турызму і сельская гаспадарка.

“Нам вельмі цікавая ваша краіна. Не хаваю, як некаторая альтэрнатыва ў тым рэгіёне для прасоўвання нашых інтарэсаў”, — адзначыў ён, дадаўшы, што ў Беларусі таксама “ёсць шмат таго, што сёння цікавіць аманскі бок”.

Лукашэнка зноў запрасіў у Мінск Султана Амана Хайсама бен Тарэка аль Саіда, назваўшы яго “вельмі прыстойным, добрым чалавекам”.

14 снежня паведамлялася аб пачатку дзеяння спрошчанага ўезду ў Аман для грамадзян Беларусі. Без візы ў краіне можна знаходзіцца не больш за 14 дзён.

Лукашэнка знаходзіўся ў Амане з рабочым візітам у снежні 2024 года. 15 снежня ён правёў перамовы з Хайсамам бен Тарэкам аль Саідам, абмеркаваўшы з ім “стан і перспектывы развіцця адносін”. 16 снежня Лукашэнка паведаміў, што Мінск і Маскат створаць “міжурадавую камісію або камітэт” і выпрацуюць дарожную карту па двухбаковым супрацоўніцтве

Паводле даных Міністэрства замежных спраў, у 2021 годзе тавараабарот паміж Беларуссю і Аманам складаў 1,5 млн долараў (беларускі экспарт — 0,9 млн). У аснове паставак з Беларусі тады ляжалі калійныя ўгнаенні і прадукты харчавання. Актуальнай інфармацыі на сайце МЗС не прадстаўлена.