28 красавіка, Позірк. Старшыня Палаты прадстаўнікоў Ігар Сергеенка ўзначаліць парламенцкую дэлегацыю Беларусі на “міжнародным патрыятычным форуме” Саюзнай дзяржавы “Вялікая спадчына — агульная будучыня”, які пройдзе 28–29 красавіка ў Валгаградзе (РФ).
Паводле інфармацыі прэс-службы ніжняй палаты беларускага парламента, мэта форуму заключаецца ў “захаванні і абароне гістарычнай памяці пра падзеі Вялікай Айчыннай вайны”.
Праца мерапрыемства пройдзе ў дзвюх секцыях — “Захаванне і абарона агульнай гістарычнай памяці” і “Патрыятычнае выхаванне на аснове гістарычных ведаў”.
У гэтыя ж дні, як паведамляецца, пройдзе пасяджэнне “моладзевай палаты” пры Парламенцкім сходзе Саюза Беларусі і Расіі, а таксама “шэраг розных патрыятычных мерапрыемстваў, прысвечаных 80-годдзю Вялікай Перамогі”.
Адміністрацыя Валгаградскай вобласці, паводле інфармацыі мясцовага выдання “Гарадскія весці”, чакае прыбыцця парламенцкіх дэлегацый з краін Садружнасці Незалежных Дзяржаў, а таксама “дружалюбных краін Еўропы, Азіі, Лацінскай Амерыкі”. Чакаецца, што агулам у мерапрыемстве возьме ўдзел больш за 500 парламентарыяў, што прадстаўляюць звыш 20 краін.
Медыя “Валгаград онлайн” паведаміла, што 28 і 29 красавіка ў горадзе будуць перакрываць вуліцы — праз візіт прэзідэнта РФ Уладзіміра Пуціна і Аляксандра Лукашэнкі.
Пра тое, што Пуцін і Лукашэнка сустрэнуцца на гэтым тыдні, раней паведаміла расійскае агенцтва ТАСС.
