Лукашэнка прапанаваў Пакістану пастаўляць прадукцыю ў Еўропу праз Беларусь

11 красавіка, Позірк. Пастаўляць прадукцыю ў Еўропу праз Беларусь прапанаваў Пакістану Аляксандр Лукашэнка 11 красавіка ў Мінску падчас размовы з журналістамі пасля перагавораў з прэм’ер-міністрам гэтай краіны Шахбазам Шарыфам.

Прэс-служба беларускага палітыка адзначыла, што гэта могуць быць “рыс і мандарыны, фармацэўтычная і тэкстыльная прадукцыя, спартыўныя тавары, адзенне і абутак”.

“Мы таксама гатовыя супрацоўнічаць з Пакістанам у плане паставак вашай прадукцыі на еўрапейскі рынак. Прынамсі, еўрапейцы з задавальненнем купяць вашу прадукцыю. Яны ж санкцыі супраць вас не ўводзілі. Таму, калі ласка, скарыстайцеся Беларуссю, якая знаходзіцца ў цэнтры Еўропы, для таго, каб прасоўваць сваю прадукцыю на Захад“, — прапанаваў Лукашэнка.

У дачыненні да Беларусі дзейнічаюць санкцыі Еўрасаюза, уведзеныя за сістэматычныя парушэнні правоў чалавека, рэпрэсіі, інструменталізацыю нелегальнай міграцыі і падтрымку расійскай ваеннай агрэсіі супраць Украіны.

У частцы транзітных паставак абмежаванні тычацца ў асноўным некаторай прадукцыі, якая пастаўляецца з краін ЕС.