Памежнікі канфіскавалі беспілотнік на мяжы з Польшчай

2 жніўня, Позірк. Трох беларускіх грамадзян, якія кіравалі беспілотным лятальным апаратам (БПЛА), затрымалі ноччу 2 жніўня вайскоўцы Брэсцкай пагрангрупы ў раёне вёскі Заполле Брэсцкага раёна, паведамляе Дзяржпагранкамітэт.

Адзначаецца, што памежнікі “спынілі парушэнне мяжы беспілотнікам” (ад Заполля да мяжы з Польшчай каля 18 км). У затрыманых былі прылада для запуску беспілотніка і ноўтбук з пракладзеным маршрутам.

За выкарыстанне беспілотнага лятальнага апарата ў памежнай зоне і парушэнне памежнага рэжыму распачаты адміністрацыйны працэс. Вінаватым пагражае штраф у памеры да 50 базавых велічынь (2 тыс. рублёў).

ДПК у чарговы раз нагадаў, што ў краіне забароненыя ўвоз, захоўванне, абарот, эксплуатацыя і выраб беспілотнікаў і выкарыстанне паветранай прасторы без належнага дазволу.

Беспілотнікі нярэдка выкарыстоўваюць для дастаўкі кантрабандных грузаў, напрыклад цыгарэт у Літву. На пачатку ліпеня Дзяржпагранкамітэт паведаміў аб затрыманні дзвюх груп грамадзян, якія падазраюцца ў парушэнні мяжы з выкарыстаннем квадракоптараў.

Памежнікі таксама затрымлівалі аператараў беспілотных апаратаў у красавіку, траўні, чэрвені.

У выніку атакі БПЛА 26 лютага 2023 года ў Мачулішчах (Мінскі раён) атрымаў пашкоджанні і быў транспартаваны на рамонт у РФ дарагі расійскі вайсковы самалёт далёкага радыёлакацыйнага выяўлення А-50.

7 сакавіка таго ж года, тлумачачы прычыны дыверсіі на вайсковым аэрадроме ў Мачулішчах, Аляксандр Лукашэнка заявіў, што сістэмы СПА не змаглі выявіць дрон з выбухоўкай, бо ён быў “маленькі”.