СМІ: На волю выйшаў другі асуджаны па справе Беларускага кангрэсу дэмакратычных прафсаюзаў

2 лістапада, Позірк. На волю выйшаў намеснік старшыні ліквідаванага ўладамі Беларускага кангрэсу дэмакратычных прафсаюзаў (БКДП) Сяргей Антусевіч, паведамляе “Наша Ніва”.

У пачатку траўня выйшла на волю яшчэ адна фігурантка справы БКДП бухгалтар Ірына Бут-Гусаім. Інфармацыя пра гэта апублікаваная на сайце праваабарончага цэнтра “Вясна”.

26 снежня 2022 года Мінскі гарадскі суд прысудзіў старшыню БКДП Аляксандра Ярашука да 4 гадоў пазбаўлення волі ва ўмовах агульнага рэжыму, Антусевіча — да 2, Бут-Гусаім — да 1,5.

Усе трое прызнаныя вінаватымі паводле ч. 1 арт. 342 Крымінальнага кодэкса (арганізацыя і падрыхтоўка дзеянняў, якія груба парушаюць грамадскі парадак, або актыўны ўдзел у іх). Акрамя таго, паводле ч. 3 арт. 361 КК (заклікі да мер абмежавальнага характару, іншых дзеянняў, накіраваных на прычыненне шкоды нацбяспецы Беларусі) асобна прызнаны вінаватым Ярашук, які неаднаразова публічна выступаў супраць санкцый.

Кіраўніцтва прафсаюзнай асацыяцыі затрымалі 19 красавіка 2022 года, пасля праваабаронцы прызналі іх палітвязнямі.

БКДП аб’ядноўваў Свабодны прафсаюз Беларускі, Свабодны прафсаюз металістаў, Беларускі прафсаюз работнікаў радыёэлектроннай прамысловасці і Беларускі незалежны прафсаюз.

У ліпені 2022 года Вярхоўны суд прыняў рашэнні аб ліквідацыі гэтых прафаб’яднанняў.