Адвакат-палітвязень Аляксандр Данілевіч пазбаўлены ліцэнзіі

27 кастрычніка, Позірк. Кваліфікацыйная камісія па пытаннях адвакацкай дзейнасці Міністэрства юстыцыі прыняла рашэнне спыніць ліцэнзію адваката Аляксандра Данілевіча “ў сувязі з прынятым Мінскай гарадской калегіяй адвакатаў рашэннем аб выключэнні адваката” з-за ўступлення ў сілу прыгавору суда “аб прызнанні яго вінаватым у здзяйсненні наўмыснага злачынства”, паведаміла прэс-служба Мінюста.

Данілевіч прыгавораны 10 красавіка да 10 гадоў пазбаўлення волі. Рашэнне вынесла суддзя Мінгарсуда Таццяна Фалькоўская. Юрыста абвінавацілі паводле ч. 1 арт. 361⁴ (садзейнічанне экстрэмісцкай дзейнасці), ч. 3 арт. 361 (заклікі да мераў абмежавальнага характару (санкцый), іншых дзеянняў, накіраваных на прычыненне шкоды нацыянальнай бяспецы). Ён быў затрыманы 20 траўня 2022 года.

Згодна з заявамі генпракуратуры, са жніўня 2020 года па травень 2022-га Данілевіч аказваў садзейнічанне Аляксандры Герасімені і Аляксандру Апейкіну (сузаснавальнікі Беларускага фонду спартыўнай салідарнасці, завочна асуджаныя на 12 гадоў зняволення) “у закліках да дзеянняў, накіраваных на прычыненне шкоды нацыянальнай бяспецы”.

Сцвярджалася таксама, што ён нібыта падрыхтаваў не менш за тры звароты стачкамаў, у якіх “выклаў загадзя ілжывыя звесткі аб палітычнай, эканамічнай, сацыяльнай сітуацыі ў Рэспубліцы Беларусь, парушэнні правоў работнікаў, заклікаў кіраўніцтва замежнай кампаніі спыніць дагаворныя адносіны з беларускім контрагентам”.

Следчы камітэт удакладніў, што гаворка ідзе аб падрыхтоўцы лістоў і дакументаў у адрас нарвежскай кампаніі Yara, якая доўгі час была буйным пакупніком угнаенняў прадпрыемства “Беларуськалій”.

8 верасня МУС уключыла адваката ў спіс “асоб, якія маюць дачыненне да экстрэмісцкай дзейнасці”.