Лукашэнка зацвердзіў прыпыненне дзеяння Дагавора аб звычайных узброеных сілах у Еўропе

29 траўня, Позірк. Аляксандр Лукашэнка 24 траўня падпісаў закон № 8-З “Аб прыпыненні дзеяння Дагавора аб звычайных узброеных сілах у Еўропе” (ДЗУСЕ). Дакумент апублікаваны на Нацыянальным прававым інтэрнэт-партале 29 траўня.

Адпаведны законапраект быў прыняты Палатай прадстаўнікоў 17 красавіка і ўхвалены Саветам Рэспублікі (СР) 6 траўня.

Заканадаўчы орган абгрунтаваў прыпыненне дзеяння ДЗУСЕ абаронай нацыянальных інтарэсаў і неабходнасцю адказаць на выхад краін Паўночнаатлантычнага альянсу з гэтага дагавора. Пра тое, што члены НАТО зрабілі тое ў адказ на адмову Расіі ад ДЗУСЕ, парламентарыі нічога не сказалі.

У практычным плане прыпыненне дзеяння дагавора азначае, што Беларусь не будзе перадаваць інфармацыю пра свае звычайныя ўзбраенні і тэхніку, прымаць і праводзіць інспекцыі па кантролі за выкананнем колькасных абмежаванняў у дачыненні да гэтай зброі.

Верхняя палата парламента нагадала, што Чэхія перастала выконваць палажэнні ДЗУСЕ ў дачыненні да Беларусі ў жніўні 2022 года, Польшча — у сакавіку 2023-га. Афіцыйны Мінск пайшоў на аналагічны крок у дачыненні да гэтых краін у кастрычніку 2023 года.

Намеснік міністра замежных спраў Юрый Амбразевіч, выступаючы ў ніжняй палаце парламента сёлета 17 красавіка, даў зразумець, што Беларусь дэ-факта працягне прытрымлівацца абмежаванняў, прапісаных у ДЗУСЕ, нават у выпадку прыпынення яго дзеяння на нацыянальным узроўні. Разам з тым ён падкрэсліў, што Мінск “адпаведнымі метадамі” будзе прытрымлівацца абмежаванняў “у рамках сістэмы Міністэрства абароны” толькі “пры ўмове стрыманасці з боку <…> суседзяў”.

“Даведачна скажу, што існыя парогавыя абмежаванні, прапісаныя ў ДЗУСЕ, значна пераўзыходзяць тыя памеры нашых Узброеных сіл, якія маюцца ў прыродзе”, — адзначыў чыноўнік.

Падпісаны 19 лістапада 1990 года ў Парыжы Дагавор аб звычайных узброеных сілах у Еўропе вызначыў гранічна дапушчальную колькасць звычайных узбраенняў і тэхнікі для шэрагу краін НАТО і Арганізацыі Варшаўскага дагавора, а таксама механізмы праверкі выканання абавязацельстваў — абмен інфармацыяй і інспекцыі. Пасля распаду СССР яго квоты часткова размеркавалі паміж сабой восем былых саюзных рэспублік.

Беларусь, якая ратыфікавала ДЗУСЕ 21 кастрычніка 1992 года, абавязалася мець не больш за 1.800 танкаў, 2.800 баявых бронемашын, 1.615 артылерыйскіх сістэм, 294 баявыя самалёты і 80 ударных верталётаў. Рэальна ж падобны патэнцыял яна ніколі не мела.