Пракуратура Мінска за 16 месяцаў выявіла больш за 180 “экстрэмісцкіх матэрыялаў”

2 траўня, Позірк. Пракуратура Мінска па выніках маніторынгу інтэрнэт-парталаў, сацыяльных сетак, тэлеграм-каналаў і іншых рэсурсаў за 2023 год і мінулы перыяд 2024-га накіравала ў суды больш за 180 заяў аб прызнанні інфармацыйнай прадукцыі “экстрэмісцкімі матэрыяламі”.

Як паведамляе прэс-служба мінскага нагляднага ведамства, суды задаволілі больш за 160 такіх заяў.

Паводле прыведзеных даных, “экстрэмісцкімі матэрыяламі” прызнаная інфармацыя, размешчаная ў 104 тэлеграм-каналах або чатах (ботах), 25 акаўнтах у сацыяльнай сетцы “ЦікТок”, 26 каналах на відэахостынгу “Ютуб”, 24 акаўнтах (супольнасцях) у “Фэйсбуку”, 20 інтэрнэт-сайтах, 17 старонках у “Інстаграме”, 13 акаўнтах у X (“Твітары”), 10 старонках (уліковых запісах) ва “УКантакце”, адным акаўнце ў “Аднакласніках”, 11 іншых інфармацыйных крыніцах (кнігах і інш.).

Акрамя таго, па заявах органаў пракуратуры Мінска прызнаныя “экстрэмісцкімі матэрыяламі” шэсць візуальных матэрыялаў у выглядзе лагатыпаў, малюнкаў і лічбавых вадзяных знакаў.