Старшынёй Савета Рэспублікі зноў абраная Качанава — аднагалосна

12 красавіка, Позірк. Старшынёй Савета Рэспублікі Нацыянальнага сходу Беларусі восьмага склікання абраная Наталля Качанава, паведамляе прэс-служба верхняй палаты.

За яе кандыдатуру прагаласаваў кожны з 58 тых, хто браў бюлетэні.

25 верасня палітыку споўніцца 64 гады. Яна родам з Полацка (Віцебская вобласць). Скончыла Наваполацкі палітэхнічны інстытут і Акадэмію кіравання.

У сістэме дзяржкіравання з 2002 года. Займала пасады старшыні Наваполацкага гарвыканкама, намесніка прэм’ер-міністра, кіраўніка Адміністрацыі прэзідэнта.

5 снежня 2019 года была прызначаная Аляксандрам Лукашэнкам членам Савета Рэспублікі сёмага склікання, абраная яго старшынёй.

Лічыцца адной з самых адданых прыхільніц рэжыму і асабіста Лукашэнкі, што неаднаразова пацвярджала словамі.

20 лютага ў Мінску на сустрэчы з кіраўнікамі сталічных устаноў аховы здароўя яна заявіла, што “такой улады, як у Беларусі, няма нідзе — яна абсалютна народная”.

Кажучы пра вайну ва Украіне летась у верасні, Качанава сцвярджала, што “ўсе абвінавачванні нашай дзяржавы нібыта ў дапамаганні агрэсіі — поўны абсурд і брудная хлусня”.

Знаходзіцца пад персанальнымі санкцыямі краін Еўрасаюза, Вялікабрытаніі, ЗША, Канады, Швейцарыі, Японіі і Украіны.