Прадстаўнік амбасады РФ абмеркаваў з беларускімі адвакатамі “ўнутраныя і знешнія выклікі”
Кіраўнік БРКА Аляксей Швакаў
5 красавіка, Позірк. “Гарманізацыю нарматыўна-прававой базы ў рамках Саюзнай дзяржавы, абарону правоў грамадзян” абмеркавалі ў Мінску 5 красавіка дарадца-пасланнік амбасады РФ у Беларусі Пётр Фралоў і старшыня Беларускай рэспубліканскай калегіі адвакатаў арганізацыі Аляксей Швакаў.
Як сцвярджае пасольства, “па меры паглыблення інтэграцыі Расія і Беларусь пастаянна пашыраюць і сінхранізуюць двухбаковую прававую базу ўзаемадзеяння”.
У ліку агульных прыярытэтаў у час сустрэчы названы “абарона асноў прававой дзяржавы, актуалізацыя норм, інстытутаў і галін права ў адпаведнасці з сучаснымі рэаліямі, тэндэнцыямі і выклікамі, прычым як унутранымі, так і знешнімі”.
Удзельнікі таксама “далі высокую ацэнку падпісанаму ў кастрычніку 2023 года двухбаковаму Пагадненню аб супрацоўніцтве паміж Федэральнай палатай адвакатаў Расіі і Беларускай рэспубліканскай калегіяй адвакатаў” і выказалі ўпэўненасць, што дакумент аблегчыць атрыманне статусу адваката і ажыццяўлення дзейнасці на тэрыторыі дзвюх краін.
Пасля прэзідэнцкіх выбараў 2020 года ў Беларусі пачаўся сістэматычны ціск на адвакатуру.
Па даных ініцыятывы “Права на абарону”, з пачатку 2020 года ў Беларусі колькасць адвакатаў скарацілася з 2,2 да менш чым 1,7 тыс. Інстытут заканадаўча фактычна пазбавіўся незалежнага ад дзяржавы статусу: з 2021 года адвакаты могуць працаваць толькі пры юрыдычных кансультацыях , загадчыкі якіх назначаюцца па ўзгадненню з Мінюстам. У 2022 годзе паўнамоцтвы загадчыкаў пашырылі.
Супраць шэрагу адвакатаў былі заведзеныя крымінальныя справы паводле палітычных матываў. На сёння ў месцах зняволення знаходзіцца шэсць палітвязняў-адвакатаў. Пад пагрозай пераследу некаторыя былі вымушаны пакінуць Беларусь.
Раней Аляксандр Лукашэнка заявіў, што адвакатура павінна знаходзіцца пад кантролем” і “дзейнічаць па законе, а не нейкіх прыдуманых норм — свабоды слова і іншых свабод”.
У Мінску 28 лютага 2024 года супрацоўнікі Камітэта дзяржбяспекі наладзілі рэйд на адвакатаў. Па інфармацыі праваабаронцаў, было затрымана сама меней 12 чалавек.
Прадстаўнікі беларускіх праваабарончых арганізацый заявілі, што “ціск на адвакацкую супольнасць шляхам масавых затрыманняў і рэйдаў прама супярэчыць гарантыям адвакацкай дзейнасці і з’яўляецца парушэннем права грамадзян на кваліфікаваную юрыдычную дапамогу”.
