У гадавіну гібелі 22-гадовай Махсы Аміні Ціханоўская аддала “даніну павагі жанчынам Ірана, якія выступаюць супраць тыраніі”

16 верасня, Позірк. Беларускі дэмакратычны лідар Святлана Ціханоўская 16 верасня “ўшанавала” на сваёй старонцы ў “Твітары” “юную Махсу Аміні, забітую год таму іранскімі ўладамі”.

“Мяне натхняюць мужныя жанчыны па ўсім свеце, якія самааддана адстойваюць свабоду і правы чалавека. Аддаю даніну павагі ўсім адважным жанчынам Ірана, якія выступаюць супраць жорсткай тыраніі”, — напісала Ціханоўская.

16 верасня 2022 года 22-гадовая Махса Аміні была затрыманая ў Тэгеране паліцыяй нораваў за “няправільнае нашэнне хіджаба”. У той жа вечар яе экстранна даставілі ў бальніцу ў стане комы, дзе яна памерла.

Улады Ірана заявілі, што прычынай смерці стаў сардэчны прыступ. Сваякі Аміні лічаць, што ў паліцэйскім участку яе збівалі.

Пасля смерці Аміні ў Іране пачаліся пратэсты, якія працягваліся 11 месяцаў. Паводле звестак праваабаронцаў, падчас падаўлення маніфестацый былі забітыя больш за 550 чалавек, у тым ліку 68 непаўналетніх і 49 жанчын. Больш за 22 тыс. былі затрыманыя. Некалькіх пратэстоўцаў суд прысудзіў да смяротнага пакарання.

Паводле Канстытуцыі, прынятай у 1979 годзе, Іран з’яўляецца ісламскай рэспублікай. Гэта адна з нямногіх у свеце тэакратычных дзяржаў.

Узначальвае дзяржаву ў Іране Вышэйшы кіраўнік. З 1989 года гэтую пасаду займае “вялікі аятала” Алі Хаменеі.

Аляксандр Лукашэнка наведваў Іран 12–13 сакавіка гэтага года. Па выніках перагавораў была падпісана “дарожная карта” на 2023–2026 гады, якая прадугледжвае ўсебаковае супрацоўніцтва ў палітычнай, эканамічнай, консульскай, навукова-тэхнічнай сферах, а таксама ў сферы адукацыі, культуры, мастацтва, СМІ і турызму.

У 2024 годзе чакаецца візіт у Беларусь прэзідэнта Ірана Эбрахіма Раісі.