Для тушэння пажару на тэрыторыі Бярозаўскага мясакансервавага камбіната задзейнічалі 11 машын МНС

10 лістапада, Позірк. Ліквідаваны пажар на тэрыторыі Бярозаўскага мясакансервавага камбіната (горад Бяроза, Брэсцкая вобласць), вынікае з паведамлення прэс-службы Міністэрства па надзвычайных сітуацыях.

Паводле інфармацыі ведамства, паведамленне пра здарэнне паступіла ўвечары 9 лістапада. На момант прыбыцця пажарных назіралася “задымленне на тэхнічным паверсе ў будынку халадзільніка прадпрыемства”.

Тушэннем пажару займаліся 11 адзінак тэхнікі МНС.

У выніку здарэння ніхто не пацярпеў. Прычыны пажару высвятляюцца.

ААТ “Бярозаўскі мясакансервавы камбінат” — адно з буйных прадпрыемстваў мясной галіны Беларусі. Выпускае каўбасныя вырабы, мясныя кансервы, паўфабрыкаты і харчовыя тлушчы.

Паводле даных за 2025 год, на прадпрыемстве працавала амаль 1.400 чалавек.