СК паведаміў аб раскрыцці забойства ў Мінску 27-гадовай даўніны

9 лістапада, Позірк. Аб устанаўленні ўдзельнікаў нападу на 20-гадовую дзяўчыну, забітую ў студзені 1999 года ў Мінску, паведаміў Следчы камітэт.

Па дадзеных ведамства, дзяўчына арандавала кватэру ў Маскоўскім раёне сталіцы і займалася нелегальным абменам валюты. Трое мясцовых жыхароў, якім на той момант было 15, 17 і 22 гады, ведалі аб буйных сумах наяўных грошай, якія яна насіла ў сумцы: “Перад нападам яны вывучылі яе звычкі і маршрут”.

Увечары 16 студзеня таго года фігуранты дачакаліся, калі ахвяра зойдзе ў пад’езд дома на пр. Газеты “Известия” (у 2005 годзе перайменаваны ў пр. Газеты “Звязда”), і пайшлі за ёй. На лесвічным маршы двое старэйшых паспрабавалі вырваць у яе сумку.

Дзяўчына пачала крычаць і клікаць на дапамогу. Па версіі следства, 15-гадовы падлетак, “баючыся з’яўлення суседзяў, дастаў нож і нанёс ёй больш за 20 раненняў”. З астатнімі ўдзельнікамі нападзення ён свае дзеянні не ўзгадняў. Як сцвярджае СК, непасрэдна ў забойстве двое іншых фігурантаў не ўдзельнічалі.

Смяротна параненая дзяўчына змагла выбрацца з пад’езда і ўпала за некалькі метраў ад уваходу. Раскрыць злачынства тады не ўдалося.

Падставай да аднаўлення расследавання ў 2026 годзе стала прызнанне мужчыны, якому на момант нападзення было 17 гадоў. Цяпер ён адбывае пажыццёвае зняволенне за трайное забойства, удакладняецца ў рэлізе.

Пасля атрымання яго паказанняў праваахоўнікі ўстанавілі месцазнаходжанне двух іншых фігурантаў. Старэйшы жыў у Магілёве, малодшы працаваў дальнабойшчыкам (месца жыхарства не ўказваецца). Абодва былі затрыманыя.

Паводле інфармацыі СК, першапачаткова яны адмаўлялі дачыненне да злачынства, затым далі прызнальныя паказанні, “стараючыся пры гэтым пераменшыць сваю ролю”.

Усе трое раней былі асуджаныя за забойствы, учыненыя пасля 1999 года.

Пры праверцы паказанняў на месцы следчыя з удзелам статыстаў аднаўлялі размяшчэнне тых, хто нападаў і пацярпелай. Мужчына, якога следства лічыць непасрэдным выканаўцам забойства, паказаў, куды наносіў удары нажом, што супала з лакалізацыяй раненняў, зафіксаваных судова-медыцынскай экспертызай 27 гадоў таму.

Лідарам групы, як сцвярджае СК, быў самы малодшы ўдзельнік.