26 кастрычніка, Позірк. Аб’яднаны пераходны кабінет (АПК) уганараваў узнагародамі семярых замежных і беларускіх дзеячаў за “шматгадовую працу на карысць Беларусі, захаванне беларускай культуры, абарону свабоды слова і падтрымку дэмакратычных памкненняў беларускага народа”.
Адпаведная пастанова №31 прынятая 24 кастрычніка.
Медалём “Гонар і годнасць” узнагароджаны беларускі журналіст і былы палітвязень Ігар Карней — за “асабістую мужнасць у абароне свабоды слова і шматгадовую працу ў галіне журналістыкі”.
Медалём “За плённую працу на карысць Беларусі” ўзнагароджаныя шэсць чалавек: беларускі выдавец і грамадскі дзеяч Ігар Іваноў, гісторык і даследчык балтыйскага рэгіёну Мэцью Кот, дацкі юрыст і грамадскі дзеяч Ёнатан Шахт Галінг Нільсэн, беларуская грамадская даследчыца Надзея Нортан, кангрэсмен ЗША Браян Фіцпатрык і беларускі юрыст, грамадскі дзеяч і мецэнат Павел Шаўцоў.
Медаль “Гонар і годнасць” заснаваны АПК у лютым 2023 года. Ім ўзнагароджваюць за выключныя заслугі перад Беларуссю.
