За тыдзень паступіла больш за 2 тыс. паведамленняў аб званках тэлефонных ашуканцаў — МУС

26 кастрычніка, Позірк. За суткі 25 кастрычніка ў міліцыю паступіла каля ста паведамленняў аб званках тэлефонных ашуканцаў, паведаміла прэс-служба МУС.

Аналагічная колькасць называлася тыднем раней.

Ведамства традыцыйна заявіла, што “дзякуючы аператыўнасці супрацоўнікаў органаў унутраных спраў і пільнасці грамадзян пераважная большасць злачынстваў папярэджана”. За дзень “зарэгістравана пяць злачынстваў, учыненых з выкарыстаннем інфармацыйна-камунікацыйных тэхналогій”.

Праведзены “Позіркам” аналіз штодзённых зводак МУС паказаў, што з 19 па 25 кастрычніка ў міліцыю паступіла больш за 2 тыс. паведамленняў аб званках тэлефонных ашуканцаў; затрымана шэсць кур’ераў, у двух з іх канфіскавана ў агульнай складанасці больш за 100 тыс. рублёў (па астатніх інфармацыя не прыводзіцца).

Як паведамлялася, з 29 верасня па 4 кастрычніка ў міліцыю паступіла больш за 1,8 тыс. паведамленняў аб званках тэлефонных, з 5 па 11 кастрычніка — звыш 2 тыс., з 12 па 18 кастрычніка — больш за 1,9 тыс.

22 кастрычніка Генпракуратура паведаміла, што з пачатку 2026 года ў краіне было зарэгістравана больш за 7 тыс. выпадкаў лічбавага махлярства з рэальнай шкодай для грамадзян.

Паводле даных Следчага камітэта, у 2025 годзе кожнае трэцяе злачынства ў Беларусі ўчынена з выкарыстаннем інфармацыйна-камунікацыйных тэхналогій, за дзевяць месяцаў 2026 года доля такіх злачынстваў склала 35%.