На мяжы Латвіі з Расіяй спыненая кантрабанда буйной партыі беларускіх цыгарэт, схаваных у моркве

20 кастрычніка, Позірк. Аб выяўленні супрацоўнікамі мытнага ўпраўлення Службы дзяржаўных даходаў Латвіі 852,8 тыс. цыгарэт з беларускімі акцызнымі маркамі, схаваных у грузе свежай морквы, паведаміла мытная служба балтыйскай дзяржавы.

10 кастрычніка на мытны пункт Грабнёва (з расійскага боку Убылинка, Пскоўская вобласць) з РФ прыбыў грузавік з морквай. Пры даглядзе ў кардонных скрынках былі выяўленыя абсталяваныя ў ніжняй частцы падвойныя адсекі, дзе знаходзілася 42.640 пачкаў цыгарэт марак Queen Menthol, Queen Superslims і NZ Black.

Сума нявыплачаных падаткаў на гэтую партыю ацэньваецца латвійскім бокам у 250 тыс. еўра.

У той жа дзень падаткова-мытная паліцыя распачала крымінальны працэс па факце кантрабанды ў буйным памеры. Затрыманы адзін чалавек, якога суд пастанавіў змясціць пад варту.

Дасудовае расследаванне працягваецца, пры гэтым, як адзначаецца ў прэс-рэлізе, “у інтарэсах следства дадатковая інфармацыя не выдаецца“.