Грамадзянін Польшчы беларускага паходжання спрабаваў перагнаць у РФ “знаёмаму беларусу” аўтамабіль, які шукаюць у Германіі

20 кастрычніка, Позірк. Польскія памежнікі не дазволілі 22-гадоваму грамадзяніну Польшчы беларускага паходжання вывезці з краіны аўтамабіль “Таёта”, паведаміла 20 кастрычніка прэс-служба Памежнай аховы гэтай дзяржавы.

Паводле інфармацыі ведамства, гэта адбылося 19 кастрычніка ў пункце пропуску Гжэхоткі на мяжы з Калінінградскай вобласцю РФ (з расійскага боку — Мамонава-2).

Адзначаецца, што аўтамабіль значыўся ў базах даных як зніклы на тэрыторыі Германіі. Кіроўца сцвярджаў, што транспартны сродак належыць яго “знаёмаму беларусу”, і ён вязе машыну менавіта яму.

Кошт аўтамабіля ацэньваецца ў 70 тыс. злотых (каля 18 тыс. долараў).