Лукашэнка: Расія яшчэ можа ваяваць ва Украіне, але знясіленне вельмі моцнае, уплыў на эканоміку велізарны

16 кастрычніка, Позірк. Мір ва Украіне будзе дасягнуты калі не ў гэтым, то ў наступным годзе, заявіў Аляксандр Лукашэнка, наведваючы 16 кастрычніка Верхнядзвінскі раён (Віцебская вобласць).

Паводле слоў палітыка, якога цытуюць яго прэс-служба і дзяржСМІ, завяршэнне вайны неабходна, і ў гэтым зацікаўленыя як Украіна, так нібыта і Расія, паколькі вайна прыводзіць да негатыўных наступстваў для абедзвюх краін.

“Так, Расія больш магутная, мацнейшая, яна яшчэ можа доўга ваяваць, — сказаў Лукашэнка. — Але ўсё роўна знясіленне вельмі моцнае, уплыў на эканоміку велізарны, вы гэта таксама бачыце. Каму гэта прыемна і трэба? Расіяне гэта разумеюць, яны гатовыя да міру. Украінцам, калі яны не пойдуць на мірнае ўрэгуляванне ў гэтым годзе, у наступным будзе яшчэ складаней, а потым і немагчыма будзе”.

“Амерыканцы намякаюць расіянам: мы цяпер гатовыя зняць санкцыі, яшчэ нейкія варыянты, але калі не пайсці на дамоўленасці з Украінай, то ў будучым годзе будзе яшчэ горш”, — дадаў прамоўца.

Розныя фактары, паводле яго слоў, “ціснуць і на Расію, і на Украіну”. “Але адназначна гэтыя фактары падштурхоўваюць да міру і Украіну, і Расію ў сілу немагчымасці далей весці такія ваенныя дзеянні”, — заявіў Лукашэнка.

Мір, адзначыў ён, неабходны таксама “з гуманітарных, чалавечых меркаванняў”. “Мы — за гэта і ў гэтых адносінах будзем рабіць усё. Любыя войны мірам сканчаюцца. Таму лепш раней, чым пазней”, — сказаў палітык, не згадаўшы аб сваёй дапаможнай ролі ў расійскай агрэсіі супраць Украіны.

Раней ён неаднаразова заяўляў пра неабходнасць міру ва Украіне, даючы зразумець, што гэта гэта павінен быць мір на расійскіх умовах.

24 лютага 2022 года Расія пачала поўнамаштабную вайну супраць Украіны — найбуйнейшую ў Еўропе пасля Другой сусветнай. Рэжым Лукашэнкі прадаставіў арміі РФ тэрыторыю для нападу на суседнюю краіну ўзімку і ўвесну 2022 года, а затым цягам многіх месяцаў з Беларусі вяліся абстрэлы ўкраінскіх гарадоў. На тэрыторыі краіны таксама лечаць расійскіх вайскоўцаў.

Паводле звестак журналістаў-расследвальнікаў, многія беларускія прадпрыемствы цяпер актыўна займаюцца вытворчасцю на карысць расійскага ВПК.