Польскія памежнікі перахапілі партыю кантрабандных цыгарэт, увезеных з Беларусі ў таварным цягніку

15 кастрычніка, Позірк. Супрацоўнікі Надбужанскага аддзела Памежнай аховы Польшчы і Люблінскай мытна-падатковай службы канфіскавалі 13,8 тыс. пачкаў цыгарэт коштам амаль 300 тыс. злотых (каля 77 тыс. долараў) без польскіх акцызных марак.

Пра гэта 15 кастрычніка паведаміла Памежная ахова Польшчы.

Адзначаецца, што партыя цыгарэт перавозілася ў грузавым цягніку. У паведамленні гаворыцца, што ў раёне населенага пункта Вулька-Дабрыньска (непадалёк ад мяжы з Беларуссю) двое мужчын выкідвалі з вагона “загорнутыя ў чорную фольгу пакеты”.

Затрыманыя двое жыхароў Бяльскага павета (Люблінскае ваяводства). За датычнасць да кантрабанды ім пагражае буйны штраф.