Памежнікі Літвы вылавілі плыт з кантрабанднымі цыгарэтамі на 13 тыс. еўра, які прыплыў з Беларусі
13 кастрычніка, Позірк. Плыт з грузам кантрабандных цыгарэт, які прыплыў з Беларусі, вылаўлены ў Вільнюскім раёне, паведаміла 13 кастрычніка Служба аховы дзяржаўнай мяжы (САДМ) Літвы.
Паводле інфармацыі ведамства, 11 кастрычніка памежнікі заўважылі ля вёскі Вількіне аб’ект, які плыў па рацэ Нярыс (беларуская назва — Вілія) уздоўж берага.
Памежнікі выцягнулі на бераг тое, што выявілася металічнай канструкцыяй у форме сняжынкі з шасцю промнямі. У поласцях промняў было знойдзена 2,4 тыс. пачкаў цыгарэт NZ Gold з беларускімі акцызнымі маркамі, абгорнутых поліэтыленавай плёнкай. Кошт тытунёвай прадукцыі з улікам падаткаў у Літве ацэньваецца ў 13.248 еўра.
На падставе факта “незаконнага распараджэння падакцызнымі таварамі” распачатае дасудовае расследаванне. За падобнае злачынства прадугледжаны штраф або пазбаўленне волі на тэрмін да 4 гадоў.
“Апошнім часам памежнікі вельмі рэдка сутыкаюцца з перапраўкай беларускіх цыгарэт на падобных плытах. У такіх выпадках грузы цыгарэт спускаюць у раку з беларускага боку, выкарыстоўваючы самаробныя плыты або розныя канструкцыі, да якіх прымацоўваюць GPS-абсталяванне”, — адзначае САДМ.
