Супраць ураджэнца Беларусі касманаўта Навіцкага ўведзены санкцыі ЕС — за ўдзел у электаральнай кампаніі на акупаваных тэрыторыях

13 кастрычніка, Позірк. Ураджэнец Чэрвеня Мінскай вобласці (грамадзянства РФ) лётчык-касманаўт Алег Навіцкі, які 12 кастрычніка адзначае сваё 55-годдзе, уключаны ў санкцыйныя спісы ЕС.

Гэта вынікае з зацверджанага 12 кастрычніка выканаўчага рэгламенту Савета ЕС 2026/2292 аб рэалізацыі рэгламенту арганізацыі № 269/2014, які датычыцца абмежавальных мер у сувязі з дзеяннямі, якія падрываюць або пагражаюць тэрытарыяльнай цэласнасці, суверэнітэту і незалежнасці Украіны.

У абгрунтаванні рашэння адзначаецца, што Навіцкі “быў кандыдатам ад Камуністычнай партыі РФ, які ўдзельнічаў у незаконных так званых “выбарах”* у Дзяржаўную думу Расіі, якія адбыліся ў верасні 2026 года на тэрыторыі так званай “данецкай народнай рэспублікі”, так званай “луганскай народнай рэспублікі”, і горада Севастопаля“.

“Фармальна ўдзельнічаючы ў якасці кандыдата ў гэтых незаконных выбарах, <…> Навіцкі актыўна садзейнічаў намаганням па легітымізацыі расійскай агрэсіўнай вайны супраць Украіны і падтрыманні незаконнай расійскай акупацыі тэрыторый Украіны. Такім чынам, <…> Навіцкі падтрымлівае і рэалізуе дзеянні і палітыку, якія падрываюць і незалежнасці Украіны”, — адзначаецца ў абгрунтаванні.

Навіцкі нарадзіўся 12 кастрычніка 1971 года. У 1988 годзе паступіў у ваеннае вучылішча ў Барысаглебску (Варонежская вобласць), і з тых часоў пражывае ў Расіі. Здзейсніў чатыры палёты ў космас.

Жанаты на грамадзянцы Беларусі Марыне Васілеўскай, якая здзейсніла палёт да МКС у 2024 годзе.

* Навіцкі ў выніку стаў дэпутатам Дзярждумы на якія прайшлі 18–20 верасня выбарах, перамогшы на выбарах па Брацкай аднамандатнай акрузе № 98 (Іркуцкая вобласць).