За паўтара года за “экстрэмісцкія злачынствы” асуджана 2,5 тыс. чалавек — генпракурор

7 кастрычніка, Позірк. Каля 2,5 тыс.чалавек асуджана за паўтара года за “экстрэмісцкія злачынствы”, заявіў генеральны пракурор Дзмітрый Гара 7 кастрычніка на сумесным пасяджэнні Палаты прадстаўнікоў і Савета Рэспублікі Нацыянальнага сходу.

Паводле яго слоў, якія перадае прэс-служба нагляднага ведамства і дзяржСМІ, у рамках спецвытворчасці “прыцягнутыя да адказнасці асобы, якія хаваюцца за межамі рэспублікі”, з 2022 года ў суды накіраваныя крымінальныя справы па абвінавачванні звыш 150 такіх асоб.

“Сумесна з органамі дзяржаўнай бяспекі праведзена работа па забароне дзейнасці тэрарыстычных і экстрэмісцкіх арганізацый. Па заявах Генеральнай пракуратуры Вярхоўны суд прызнаў тэрарыстычнай арганізацыяй Аб’яднаны пераходны кабінет і экстрэмісцкай — Еўрапейскі гуманітарны ўніверсітэт”, — сказаў Гара.

З 2020 года палітычнымі зняволенымі ў Беларусі прызнана 4.815 чалавек, паведамляецца ў справаздачы аб сітуацыі з правамі чалавека ў краіне ў верасні 2026 года, падрыхтаваным праваабарончым цэтрам “Вясна”.

Мінімум 10.172 чалавекі за гэты час сутыкнуліся з палітычна матываваным крымінальным пераследам і мінімум 8.696 чалавек былі асуджаныя, у тым ліку завочна.

Працэдура спецыяльнай вытворчасці прымяняецца па 34 складах злачынстваў. Сярод іх — акт тэрарызму, генацыд, найміцтва, дзяржаўная здрада, дыверсія, стварэнне экстрэмісцкага фарміравання або ўдзел у ім, масавыя беспарадкі, заклікі да ўвядзення санкцый.

14 красавіка Вярхоўны суд прызнаў “экстрэмісцкай арганізацыяй” Еўрапейскі гуманітарны ўніверсітэт, які базуецца ў Вільнюсе (Літва). Пра гэта абвясціў Дзмітрый Брылёў — начальнік упраўлення Генеральнай пракуратуры, якая звярнулася ў суд з адпаведнай заявай на падставе закона “аб супрацьдзеянні экстрэмізму”.

18 ліпеня Камітэт дзяржаўнай бяспекі дадаў у “тэрарыстычны” спіс Аб’яднаны пераходны кабінет.