СК перакваліфікаваў абвінавачванне па справе аб гібелі 18-гадовага стажора на атракцыёне ў Магілёве — фігурантам стала загадчыца

16 верасня, Позірк. Следчы камітэт паведаміў аб устанаўленні абставінаў гібелі 18-гадовага стажора на атракцыёне “Сальта” ў Магілёве.

“Праведзены значны комплекс следчых і працэсуальных дзеянняў, накіраваных на ўстанаўленне ўсіх абставінаў таго, што адбылося. Дапытаныя шматлікія сведкі, у тым ліку работнікі парку, наведвальнікі, службовыя асобы арганізацыі адпачынку і забаў. Праведзеныя вочныя стаўкі, якія дазволілі ліквідаваць супярэчнасці ў паказаннях і аднавіць аб’ектыўную карціну падзей”, — заявілі ў ведамстве.

Следчым “дэталёва вывучана і прааналізавана канфіскаваная дакументацыя: загады, службовыя інструкцыі, часопісы інструктажоў, дакументы па допуску да працы і ахове працы, а таксама тэхнічная дакументацыя на атракцыён “Сальта”.

Па выніках расследавання адказнасць за дапушчаныя парушэнні ўскладзена на 25-гадовую загадчыцу паркам атракцыёнаў.

“З’яўляючыся службовай асобай, адказнай за выкананне патрабаванняў тэхнікі бяспекі і аховы працы на аб’ектах парку, яна самастойна дапусціла да працы 18‑гадовага кандыдата на працаўладкаванне. Малады чалавек выконваў абавязкі на патэнцыйна небяспечным аб’екце без заключэння працоўнага або грамадзянска‑прававога дагавора, праверкі ведаў па пытаннях прамысловай бяспекі і ахове працы, медыцынскага агляду, навучання, стажыроўкі і першаснага інструктажу”, — гаворыцца ў паведамленні.

У выніку, як заяўлена, юнак кіраваў атракцыёнам, не валодаючы навыкамі бяспечнага выканання работ. “Па завяршэнні працоўнага цыклу ён не ўсталяваў балансір з каруселлю на фіксатар перад здыманнем ахоўных прылад з пасажыраў, парушыўшы патрабаванні тэхнікі бяспекі. У момант высадкі пасажыраў здарыўся самаадвольны рух балансіра, выкліканы зрушэннем грузу. Малады чалавек атрымаў смяротную траўму галавы і памёр на месцы”, — удакладняе СК.

Загадчыца парку атракцыёнаў абвінавачваецца паводле ч. 2 арт. 306 Крымінальнага кодэкса (парушэнне правілаў тэхнікі бяспекі і іншых правілаў аховы працы службовай асобай, адказнай за іх выкананне, што пацягнула па неасцярожнасці смерць чалавека). У дачыненні да яе ўжытая мера стрымання ў выглядзе падпіскі аб нявыездзе.

Аб узбуджэнні крымінальнай справы па факце гібелі 18-гадовага стажора на атракцыёне ў Магілёве СК паведаміў 3 траўня.

Тады адзначалася, што расследаванне праводзіцца ў дачыненні да 56-гадовага дырэктара арганізацыі адпачынку і забаў, яму інкрымінавана ч. 2 арт. 428 КК (службовая халатнасць, якая пацягнула па неасцярожнасці смерць чалавека).

Пра гібель стажора СК паведаміў 1 траўня.

Паводле папярэдняй інфармацыі, стажор, які праходзіў навучанне на пасаду аператара атракцыёнаў, дапамагаў наведвальніку бяспечна пакінуць карусель і “не зафіксаваў працоўны механізм”.

“У гэты момант яго зачапіла рухомая частка атракцыёну. У выніку ён атрымаў цяжкую траўму галавы, ад якой памёр”, — гаварылася ў паведамленні.