Лукашэнка ўхваліў праект пагаднення аб гандлёва-эканамічным супрацоўніцтве з Уругваем

15 верасня, Позірк. Праект пагаднення аб гандлёва-эканамічным супрацоўніцтве з Уругваем ухваліў Аляксандр Лукашэнка, паведамляе яго прэс-служба.

Адпаведны ўказ ён падпісаў 15 верасня.

Праект пагаднення зацверджаны “ў якасці асновы для правядзення перамоваў”, на якія ўпаўнаважана Міністэрства замежных спраў, гаворыцца ў паведамленні.

Сцвярджаецца, што дагавор “накіраваны на стварэнне асновы для паглыблення эканамічных сувязяў дзвюх дзяржаў”. Пагадненнем вызначаюцца “асноўныя мэты, сярод якіх садзейнічанне развіццю ўзаемадзеяння паміж суб’ектамі гаспадарання бакоў, абмену інфармацыяй аб гандлёвых магчымасцях і заканадаўстве, якое прымяняецца, пашырэнню і дыверсіфікацыі гандлёвых патокаў”.

Дакументам прадугледжваецца таксама “стварэнне міжурадавай беларуска-уругвайскай сумеснай камісіі па гандлёва-эканамічным супрацоўніцтве, замацоўваюцца яе асноўныя функцыі і парадак правядзення пасяджэнняў”.

З сакавіка 2025 года амбасадарам Беларусі ва Уругваі (па сумяшчальніцтве), а таксама Парагваі з’яўляецца амбасадар у Бразіліі Андрэй Андрэеў. Ва Уругваі дыпламат даверчых грамат пакуль не ўручаў.

У Мінску па сумяшчальніцтве акрэдытаваны амбасадар Уругвая ў Расіі (уручыў даверчыя граматы Лукашэнку 1 кастрычніка 2024 года).

Паводле інфармацыі на сайце амбасады ў Бразіліі, дыпламатычныя адносіны паміж Беларуссю і Уругваем устаноўленыя 7 ліпеня 1992 года, узаемадзеянне паміж імі “ажыццяўляецца пераважна ў рамках міжнародных арганізацый”.

Даных па аб’ёмах двухбаковага гандлю не прыводзіцца.