Беларускі кіроўца аўтацягніка затрыманы пры ўездзе ў Польшчу з 3 праміле алкаголю

15 верасня, Позірк. Аб затрыманні ў пункце пропуску Кукурыкі (з беларускага боку — Казловічы) грамадзяніна Беларусі, які кіраваў грузавіком у стане моцнага алкагольнага ап’янення, паведаміла 15 верасня Люблінская мытна-падатковая служба (Польшча).

Адзначаецца, што паводзіны кіроўцы і яго манера кіравання здаліся супрацоўнікам службы падазронымі. Пры праверцы алкатэстар паказаў каля 3 праміле алкаголю ў выдыханым паветры.

Супрацоўнікі не дазволілі мужчыну працягнуць рух і паведамілі пра здарэнне ў паліцыю Цярэспаля.

Кіроўца ехаў з Беларусі ў Польшчу. Паводле сцвярджэння службы, кіруючы аўтацягніком масай некалькі дзясяткаў тон у такім стане, ён “уяўляў рэальную пагрозу для іншых удзельнікаў дарожнага руху”.

Беларусу пагражае адказнасць паводле арт. 178a Крымінальнага кодэкса Польшчы, які прадугледжвае за кіраванне транспартным сродкам у стане алкагольнага ап’янення да трох гадоў пазбаўлення волі.