Падсанкцыйны “Планар” выкарыстоўвае гродзенскае ТАА “Будгеадар” для ўвозу камплектуючых з ЕС — BelPol
17 жніўня, Позірк. Падсанкцыйнае ААТ “Планар“ (Мінск) выкарыстоўвае гродзенскае ТАА “Будгеадар” для ўвозу крытычна важнага замежнага абсталявання з краін Еўрапейскага саюза, паведамляе BelPol у сваім чарговым расследаванні.
Паводле звестак арганізацыі, пастаўкі ўключаюць такія камплектуючыя, як манахромная камера машыннага зроку XIMEA xiQ MQ013MG-ON-S7, якая вырабляецца на прадпрыемстве ў Славакіі пры галаўным офісе нямецкага брэнду XIMEA GmbH, а таксама прэцызійныя рэдуктары французскай кампаніі Girard Transmissions, якая ўваходзіць у групу Nidec Drive Technology.
Нягледзячы на тое, што профіль кампаніі — гандаль дарожнымі і дахавымі матэрыяламі, яна задзейнічаная ў ланцужках паставак электронікі і кампанентаў для прамысловай аўтаматызацыі. Выкарыстанне няпрофільнай камерцыйнай структуры для імпарту высокатэхналагічных кампанентаў паказвае на прымяненне пасрэдніцкай схемы для забеспячэння “Планара” крытычна важнымі замежнымі камплектуючымі ва ўмовах дзейных санкцый, адзначае BelPol.
“Будгеадар” ужо фігураваў у расследаваннях арганізацыі аб пастаўках абсталявання агульным коштам 358.816 еўра, уключаючы прамысловы CO2-лазер Luxinar OEM-45i X, для Гродзенскай тытунёвай фабрыкі “Нёман“, якая знаходзіцца пад санкцыямі.
16 сакавіка BelPol паведамляў, што ў выніку ўкраінскай атакі на прадпрыемства “Група крэмній ЭЛ“ у Бранску ракетамі Storm Shadow 10 сакавіка было знішчана абсталяванне “на мільёны долараў ЗША“, пастаўленае “Планарам“.
Арганізацыя паведаміла, што ў яе распараджэнні маюцца кантракты, згодна з якімі “Планар“ у 2022-2025 гадах паставіў расійскаму прадпрыемству “дзясяткі установак, якія выкарыстоўваюцца ў вытворчасці мікрасхем“.
“Планар” з 5 снежня 2023 года знаходзіцца ў санкцыйных спісах ЗША, з 22 лютага 2024-га — Вялікабрытаніі, з 24 лютага 2024-га — Аўстраліі, з 9 жніўня 2024-га — Канады, з 27 сакавіка 2025-га — Еўрапейскага саюза, з 9 мая 2025-га — Украіны.
У сакавіку мінулага года аб’яднанне BelPol заявіла, што прадпрыемства працягвае закупляць абсталяванне ў ЗША, выкарыстоўваючы для абыходу санкцый у якасці пасярэднікаў кітайскія і карэйскія кампаніі.
Мінск падтрымлівае Маскву ў развязанай ёю ў 2022 годзе поўнамаштабнай вайне супраць Украіны. Прадпрыемствы Дзяржкамваенпрама актыўна працуюць на расійскі абаронны заказ.
