Кіроўца мікрааўтобуса з беларускімі турыстамі, які разбіўся ў Грузіі, не меў правоў адпаведнай катэгорыі, ён змешчаны пад арышт

15 жніўня, Позірк. Змешчаны пад арышт кіроўца мікрааўтобуса з беларускімі турыстамі, які разбіўся ў Грузіі. Рашэнне прыняў 15 жніўня суд у Азургеці (рэгіён Гурыя), паведамляе мясцовы тэлеканал Pirveli.

Адзначаецца, што кіроўца быў дастаўлены ў суд з лякарні, куды быў шпіталізаваны з множнымі траўмамі.

МУС Грузіі расследуе справу, заведзеную паводле арт. 276 Крымінальнага кодэкса (парушэнне правілаў бяспекі руху або эксплуатацыі транспарту). Пункт 7 гэтага артыкула (смерць двух або больш чалавек) прадугледжвае пазбаўленне волі на тэрмін ад 6 да 10 гадоў.

Паводле інфармацыі TV Pirveli, падчас расследавання высветлілася, што кіроўца не меў правоў адпаведнай катэгорыі, якія дазваляюць пераводзіць такую колькасць пасажыраў.

Увечары 12 жніўня ў выніку падзення мікрааўтобуса з вузкай шашы ў яр чатыры чалавекі загінула, 15 атрымалі раненні і былі дастаўлены ў мясцовыя бальніцы. Надзвычайнае здарэнне адбылося ў раёне горнага курорта Гомісмта.

14 жніўня стала вядома пра выпіску чатырох пацярпелых.