Амбасада Японіі ў Беларусі аб’явіла конкурс на ўдзел ва ўрадавай праграме маладзёжнага абмену MIRAI
15 жніўня, Позірк. З 31 ліпеня па 31 жніўня амбасада Японіі ў Беларусі прымае заяўкі на ўдзел у праграме маладзёжнага абмену MIRAI (Mutual-understanding, Intellectual Relations and Academic Ехсһапде Initiative — праграма ўзаемаразумення, інтэлектуальнага і акадэмічнага абмену; абрэвіятура перакладаецца з японскай як “будучыня”).
Праграма рэалізуецца Міністэрствам замежных спраў Японіі з 2015 года для еўрапейскіх студэнтаў і накіраваная на “паглыбленне разумення Японіі”. У снежні 2026-га — студзені 2027 года адабраныя студэнты правядуць тыдзень у гэтай краіне, дзе “змогуць пагутарыць са студэнтамі з іншых еўрапейскіх краін і паглыбіць свае веды ў галіне навукі і тэхнікі, а таксама японскай дыпламатыі”.
Новая праграма распаўсюджваецца на студэнтаў, магістрантаў і аспірантаў з краін Еўрасаюза, Заходніх Балкан, Цэнтральнай Азіі, Каўказа і інш. прадугледжана фарміраванне пяці груп па розных напрамках з агульнай колькасцю ўдзельнікаў 77.
На Беларусь выдзелена адно месца ў 4-й групе (навука і тэхналогіі) з 15 чалавек, якая будзе знаходзіцца ў Японіі з 20 па 26 студзеня.
Іншыя групы зоймуцца міратворчасцю; дыпламатыяй і палітыкай бяспекі; эканомікай і бізнесам; стартапамі ў сферы штучнага інтэлекту.
Перад паездкай кожны ўдзельнік павінен будзе прайсці дзве падрыхтоўчыя анлайн-сесіі. Мова праграмы англійская.
У праграму знаходжання ў Японіі ўключаныя лекцыі і сустрэчы са студэнтамі мясцовых вну, абмен думкамі з прадстаўнікамі розных галін. Запланаваная экскурсійная праграма. Японскі бок аплачвае ўдзельнікам авіябілеты і выдаткі на месцы.
